मलाईका अरोरा आणि अर्जुन कपूर या दोघांचाही मिलान एअरपोर्टवरचा फोटो सोशल मीडियावर व्हायरल झाला. ही बातमी चर्चेत असतानाच हे दोघे लवकरच विवाहबंधनात अडकण्याची शक्यता आहे अशीही बातमी समोर येते आहे. आत्तापर्यंत या दोघांनीही रिलेशनशिपमध्ये असल्याची कबुली दिलेली नाही. मात्र लवकरच या दोघांच्या विवाहाची घोषणा होऊ शकते अशी शक्यता आहे. गेल्या काही वर्षांपासून हे दोघे रिलेशनशिपमध्ये असल्याच्या चर्चा आहेत. मात्र आम्ही चांगले मित्र आहोत असं म्हणून मलाइकाने हा विषय कायमच टाळला आहे. दरम्यान खात्रीलायक वृत्तानुसार मलाईका अरोरा आणि अर्जुन कपूर हे दोघेही पुढील वर्षी विवाहबंधनात अडकणार आहेत अशी माहिती समोर आली आहे. www.filmfare.com ने यासंदर्भातले वृत्त दिले आहे. नुकतेच अबू जानी आणि संदीप खोसला यांच्या शोमध्ये हे दोघेही गेले होते. तिथे त्यांचा एकमेकांबद्दलचा अंदाज, एकमेकांबद्दलची केमिस्ट्री खूप काही सांगून गेली. या शोमध्ये ते एकमेकांबद्दल बोलत नव्हते मात्र ते एकमेकांसोबत खूप आनंदी दिसत होते. आता आपले हेच नाते पुढे घेऊन जाण्यासाठी या दोघांनी विवाह करण्याचा निर्णय घेतला आहे अशी माहिती सूत्रांनी दिली आहे. त्यामुळे आता या दोघांच्या विवाहाची तारीख ठरली आणि त्यांचे शुभमंगल लागले तर आश्चर्य वाटायला नको.
