बॉलिवूड अभिनेत्री कंगना रणौत तिचा आगामी चित्रपट ‘थलाइवी’च्या चित्रीकरणामध्ये व्यग्र आहे. या चित्रपटाचे हैदराबाद येथे चित्रीकरण सुरु आहे. दरम्यान कंगनाने अभिनेता संजय दत्तची भेट घेतली असल्याचे समोर आले आहे. याबाबात तिने सोशल मीडिया पोस्टद्वारे माहिती दिली आहे.

नुकताच कंगनाने एक ट्विट केले आहे. या ट्विटमध्ये तिने संजय दत्तशी भेट झाल्याचे म्हटले आहे. ‘हैदराबादमध्ये आम्ही एकाच हॉटेलमध्ये राहत आहोत हे कळताच आज सकाळी मी संजू सरांना भेटण्यासाठी गेले. मी त्यांच्या प्रकृतीविषयी विचारपूस केली. पण जेव्हा मी त्यांना पाहिले तेव्हा ते हँडसम आणि निरोगी दिसत होते. मी तुमच्या निरोगी आयुष्यासाठी देवाकडे प्रार्थना करते’ या आशयाचे ट्विट कंगनाने केले आहे.

८ ऑगस्ट रोजी संजयला श्वास घेण्यास त्रास होत होता. त्यानंतर त्याला लीलावती रुग्णालयात दाखल करण्यात आले होते. त्यावेळी त्याची करोना चाचणी देखील करण्यात आली. त्याचे रिपोर्ट निगेटिव्ह आल्याचे डॉक्टरांनी सांगितले. त्यानंतर संजय दत्तला तिसऱ्या स्टेजचा फुफ्फुसाचा कर्करोग झाल्याचे कळाले. ११ ऑगस्ट रोजी संजय दत्तने या संदर्भात सोशल मीडियाद्वारे माहिती दिली. आता संजय दत्तने कर्करोगावर मात केली असून त्याने आगामी चित्रपटाचे चित्रीकरण सुरु केले आहे.