छोट्या पडद्यावरील लोकप्रिय ठरत असलेली 'अग्गंबाई सासूबाई' ही मालिका दिवसेंदिवस रंगतदार होत आहे. या मालिकेतील कलाकार प्रेक्षकांच्या पसंतीत उतरले असून आजोबांची चाहत्यांमध्ये चर्चा रंगत आहे. घरात शिस्तीचं वातावरण कायम ठेवणारे पण तेवढेच प्रेमळ असलेल्या आजोबांची स्टाइल अनेकांना आवडत आहे. मालिकेमध्ये आजोबांची भूमिका रवी पटवर्धन यांनी साकारली आहे. रवी पटवर्धन ८२ वर्षांचे असून या वयातही त्यांचा अभिनय वाखाणण्याजोगा आहे. रवी पटवर्धन यांनी कलाविश्वामध्ये येण्यापूर्वी रिझर्व्ह बॅकेमध्ये काम केलं होतं. त्यानंतर त्यांचं कलाविश्वात पदार्पण झालं. भारदस्त आवाज आणि उत्तम अभिनयशैली यावर त्यांनी अनेकांची मनं जिंकली. इतकंच नाही तर या कारकिर्दीमध्ये त्यांनी २०० पेक्षा अधिक चित्रपट आणि नाटकांमध्ये काम केलं आहे. इतकंच नाही तर या वयामध्ये त्यांनी भगवतगीतेचे ७०० श्लोक पाठ करून शृंगेरी मठाच्या परीक्षेत पहिला क्रमांक पटकावला आहे. दरम्यान, त्यांनी ‘तेरा पन्ने’ ही मालिका गाजवली होती यात हेमा मालिनी मुख्य भूमिकेत पाहायला मिळाली होती. 'उंबरठा', 'बिन कामाचा नवरा', 'शेजारी शेजारी', 'अशा असाव्या सुना', 'तक्षक', 'तेजाब', 'नरसिंह', 'प्रतिघात', 'राजू बन गया जेंटलमेन', 'चमत्कार', 'युगपुरुष' अशा अनेक चित्रपटांमध्ये ते झळकले आहेत.
