काही महिन्यांपूर्वी अभिनेत्री सोनाली कुलकर्णीने तिच्या वाढदिवशी चाहत्यांना एक सरप्राइज दिलं. हे सरप्राइज म्हणजे, तिच्या साखरपुड्याची बातमी. २ फेब्रुवारी रोजी दुबईत सोनालीचा साखरपुडा पार पडला. त्यानंतर लॉकडाउनमुळे ती काही दिवस तिथेच अडकली होती. आता गणेशोत्सवादरम्यान सोनालीचा होणारा नवरा कुणाल बेनोडेकर भारतात आला. सोनालीने हीच संधी साधत तिच्या सर्व मित्रमैत्रिणींची भेट कुणालशी करून दिली आहे. दुबईत पार पडलेल्या साखरपुड्याला सोनालीचे कलाविश्वातील मित्र-मैत्रिणी उपस्थित राहू शकले नव्हते. त्यामुळे आता सई ताम्हणकर, प्रार्थना बेहरे, फुलवा खामकर या सोनालीच्या मैत्रिणींनी कुणालची भेट घेतली. सई आणि प्रार्थनाने याचे फोटो सोशल मीडियावर पोस्ट केले आहेत. जेव्हा दाजी येतात घरी, असं कॅप्शन देत सईने कुणालसोबतचा फोटो पोस्ट केला आहे. तर दुसऱ्या फोटोमध्ये सई, कुणाल आणि सोनाली हे तिघंजण पाहायला मिळत आहेत. अभिनेत्री प्रार्थना बेहरे व तिच्या पतीनेसुद्धा सोनाली व कुणालची खास भेट घेतली. या भेटीदरम्यानचा सेल्फीसुद्धा प्रार्थनाने सोशल मीडियावर पोस्ट केला. २ फेब्रुवारी रोजी दुबई मरिना या ठिकाणी मोजक्या कुटुंबीयांच्या उपस्थितीत सोनाली व कुणालचा साखरपुडा पार पडला. लवकरच हे दोघं विवाहबंधनात अडकणार आहेत. कुणाल लंडन इथला असून तो कामानिमित्त दुबईत वास्तव्यास असतो. कुणालचं शिक्षण लंडनमधल्या 'मर्चंट्स टेलर स्कूल'मध्ये झालं. त्यानंतर 'लंडन स्कूल ऑफ इकॉनॉमिक्स अँड पोलिटिकल सायन्स'मधून त्याने उच्च शिक्षण घेतलं.
