लंडनहून भारतात येताच गायिका कनिका कपूर चर्चेत आहे. या चर्चांना तिची करोना चाचणी पॉझिटीव्ह आल्यामुळे उधाण मिळाले आहे. पण कनिकाने तिला करोनाचा संसर्ग झाल्याचे सर्वांपासून लपवल्याचे आरोप अनेकांनी तिच्यावर केले. सोशल मीडियावर कनिकावर जोरदार टीका करण्यात आली. आता बॉलिवूड अभिनेत्री तापसी पन्नूने कनिकाच्या निष्काळजीपणावर तिची प्रतिक्रिया दिली आहे. नुकताच तापसीने झूम टीव्हीला मुलाखत दिली. यामध्ये तिला कनिकाशी संबंधीत काही प्रश्न विचारण्यात आले होते. त्यावर तिने, 'ही खूप वाईट गोष्ट आहे. जर तिला करोना झाल्याचे माहितीच नसेल तर ती वेगळी गोष्ट आहे. पण जर तिला माहित असताना देखील ती लोकांच्या संपर्कात येत होती तर मग हे निराशाजनक आहे' असे तापसी म्हणाली. 'विमानतळावर ती करोना चाचणीसाठी गेली असल्याचे कनिकाने म्हटले. पण काही कारणामुळे तिची चाचणी झाली नाही. जर तिला स्वत:ला करोनाची कोणतीही लक्षणे जाणवत होती तर तिने स्वत:चे विलगीकरण करुन घ्यायला हवे होते. मला असे वाटते की दोघांचीही जबाबदारी होती' असे तापसी पुढे म्हणाली आहे. कनिका आपल्या मुलांना भेटून लंडहून भारतात परतल्याचे म्हटले जाते. त्यानंतर ती अनेक पार्ट्यांमध्ये सहभागी झाली. जवळपास ३५० ते ४०० लोकांच्या संपर्कात आली. काही दिवसांनंतर कनिकाची करोना चाचणी पॉझिटीव्ह आली. त्यामुळे सगळीकडे खळबळ उडाली. तिच्या संपर्कात आलेल्या प्रत्येक व्यक्तीची करोना चाचणी करण्यात येत आहे. तसेच कनिका थांबलेले संपूर्ण हॉटेल खाली करण्यात आले आहे. आता सध्या कनिकावर लखनऊमधील रुग्णालयात उपचार सुरु आहेत.
