‘देसी गर्ल’ ते ‘क्वांटिको गर्ल’ असा प्रवास करणारी अभिनेत्री प्रियांका चोप्रा सोशल मीडियावर कायमच चर्चेत असते. कधी तिच्या चित्रपटांमुळे तर कधी तिच्या पर्सनल लाइफमुळे.  प्रियांका कायम चाहत्यांसोबत जोडून राहण्याचा प्रयत्न करत असते. विदेशी सूनबाई झालेली प्रियांका लवकरच द व्हाइट टायगर या आगामी चित्रपटात झळकणार आहे. त्यामुळे सध्या सोशल मीडियावर पुन्हा एकदा प्रियांकाची चर्चा सुरु झाली आहे.

‘द व्हाइट टायगर’ हा चित्रपट अरविंद अडिग यांच्या ‘द व्हाइट टाइगर’ या पुस्तकावर आधारित आहे. या चित्रपटात प्रियांका चोप्रा मुख्य भूमिकेत झळकणार असून तिच्यासोबत अभिनेता राजकुमार राव स्क्रीन शेअर करणार आहे. अलिकडेच या चित्रपटाचं पोस्टर प्रदर्शित झालं आहे. हा चित्रपट लवकरच नेटफ्लिक्सवर प्रदर्शित होणार आहे.

या चित्रपटामध्ये मी पिंकी नामक भूमिका साकारत आहे. तर अभिनेताआदर्श गौरव हा बलराम हलवाई या भूमिकेत पाहायला मिळणार आहे. या चित्रपटाच्या माध्यमातून एका कुटुंबाची आणि एका मुलाच्या संघर्षाची कथा पाहायला मिळणार आहे. विशेष म्हणजे आतापर्यंत मी अनेक नवोदित कलाकारांसोबत काम केलं, मात्र, आदर्श गौरव हा अत्यंत हुशार आणि गुणी अभिनेता आहे, असं प्रियांका म्हणाली.

दरम्यान,दिग्दर्शक रमिन बहरानी या चित्रपटाचं दिग्दर्शन करणार आहेत. तर मुकुल देवडा या चित्रपटाची निर्मिती करत आहे. विशेष म्हणजे प्रियांका या चित्रपटात मुख्य भूमिका साकारण्यासोबतच एक्झिकेटिव्ह प्रोड्युसरची भूमिकादेखील पार पाडणार आहे. प्रियांका आणि राजकुमार रावसोबतच अभिनेता आदर्श गौरवदेखील स्क्रीन शेअर करणार आहे.