सध्या सगळीकडे नवरीत्रीचा उत्साह आहे. त्यामुळे प्रत्येकाच्या घरी आनंद आणि चैतन्यमय वातावरण आहे. विशेष म्हणजे नवरात्रोत्सवाचा हा जल्लोष मालिकांच्या माध्यमांमधूनदेखील पाहायला मिळतो. काही दिवसांपूर्वीच 'अग्गंबाई सासूबाई' या मालिकेत अधिकमासाचा कार्यक्रम पार पडला. त्यानंतर आता मालिकेतील कलाकारांना दसऱ्याचे वेध लागले आहे. म्हणूनच लवकरच या मालिकेत आता धुमधडाक्यात दसरा साजरा केला जाणार आहे. सणावाराच्या दिवशी संपूर्ण कुटुंबातील लोक राग-लोभ विसरून एकत्र येतात. असंच काहीसं अग्गंबाई सासूबाई मालिकेत पाहायला मिळणार आहे. बबड्या म्हणजेच सोहम आणि अभिजीत राजे दसरा साजरा करताना दिसणार आहेत. विशेष म्हणजे दसऱ्याच्या निमित्ताने आसावरी अभिजीत राजेंना खास स्वत: शिवलेलं एक जॅकेट भेट म्हणून देणार आहे. दरम्यान, दसऱ्याच्या निमित्ताने अभिजीत आणि आसावरी यांच्या घरी पुन्हा आनंदाचं वातावरण पाहायला मिळणार आहे. हा विशेष भाग २४ ऑक्टोबर रोजी रंगणार आहे. सध्या छोट्या पडद्यावरील लोकप्रिय मालिकांमध्ये अग्गंबाई सासूबाई या मालिकेचा आवर्जुन समावेश केला जात आहे.