‘बबन’च्या निर्मितीत ते १०० रुपये ठरले मोलाचे

मनोहर मुंगी आणि जोशी काका अश्या या दोन प्रेक्षकांनी दिलेली शंभरची नोट बबन चित्रपटाच्या निर्मिती मार्गावर खारीचा वाटा ठरली. आपल्या चित्रपटाला मिळालेल्या या पहिल्या मदतनीसांचा दिग्दर्शक भाऊराव क-हाडे ‘बबन’चे सहनिर्माते म्हणून उल्लेख करतात. २०१५ रोजी ‘ख्वाडा’ने गाजवलेले राष्ट्रीय आणि आंतरराष्ट्रीय चित्रपट महोत्सव सर्वश्रुत आहे. त्यादरम्यान ११ जानेवारी २०१५ रोजी झालेल्या पुणे फेस्टिवलमध्येदेखील ‘ख्वाडा’ने आपला दबदबा कायम राखला होता. त्यावेळेस या महोत्सवात आलेल्या लाखो प्रेक्षकांनी ‘ख्वाडा’ ला पसंती दिली होती. मनोहर मुंगी आणि जोशी काका या दोन प्रेक्षकांनी तर सिनेमा पाहून आल्यानंतर खास भाऊरावांची भेट घेतली होती. ‘आम्ही नाट्यक्षेत्रातली माणसे असून, आम्हाला सिनेमाबद्दल अधिक काही सांगता येणार नाही. मात्र तुम्ही जे काही सादर केले आहे, ते खूप अप्रतिम होते’, या शब्दात त्यांनी भाऊरावांचे कोडकौतुक करत आपल्याकडील १०० रुपये त्यांना बक्षीस म्हणून देऊ केले.

वाचा : ‘जगावेगळी अंतयात्रा’ या चित्रपटात भाऊ कदमची मुख्य भूमिका

भाऊराव सांगतात की, ‘मी ते पैसे घेत नव्हतो. मात्र त्यांनी हे पैसे आम्ही तुला खाऊ म्हणून नव्हे तर तुझ्या आगामी सिनेमाच्या निर्मितीमध्ये याचा वापर कर, असे सुचवले. त्यामुळे त्यांचा आशीर्वाद समजून मी ते पैसे घेतले, आणि ‘बबन’च्या मुहूर्तावर त्याचा वापर केला,’ या दोन्ही प्रेक्षकांचा सन्मान करण्यासाठी भाऊरावांनी ‘बबन’ सिनेमाच्या क्रेडीट लिस्टमध्ये त्यांचा विशेष सहनिर्माता म्हणून उल्लेख केला आहे.

येत्या २३ मार्च रोजी प्रदर्शित होणाऱ्या ‘बबन’ या सिनेमाचे भाऊरावांनी लेखनदेखील केले असून, ‘ख्वाडा’ अभिनेता भाऊसाहेब शिंदेची यात प्रमुख भूमिका आहे. त्याच्यासोबत गायत्री जाधव ही नवोदित अभिनेत्री ‘बबन’ मध्ये झळकणार आहे.