चतुरस्र..

सौरभ शुक्ला (फोटो सौजन्य: इंडियन एक्सप्रेस )

हिंदी रंगभूमी आणि चित्रपटांतील प्रख्यात अभिनेते सौरभ शुक्ला यांचे अनुभवी बोल ऐकण्याची संधी यंदा ‘लोकसत्ता लोकांकिका’ या आंतरमहाविद्यालयीन एकांकिका स्पर्धेच्या महाअंतिम फेरीच्या निमित्ताने मिळणार आहे. ‘लोकसत्ता लोकांकिका’ स्पर्धेचा महाअंतिम सोहळय़ाचा मंच कायमच रंगभूमी आणि चित्रपटसृष्टी गाजवणाऱ्या दिग्गज कलाकारांच्या प्रमुख उपस्थितीने वलयांकित झालेला आहे. यंदा ‘सत्या’ चित्रपटातील कल्लूमामा या व्यक्तिरेखेने घरोघरी लोकप्रिय झालेले लेखक, दिग्दर्शक, अभिनेते सौरभ शुक्ला हे प्रमुख पाहूणे म्हणून महाअंतिम सोहळय़ाला उपस्थित राहणार आहेत.

सौरभ शुक्ला यांची रुपेरी पडद्यावर अभिनयाची सुरुवात ‘बँडिट क्वीन’ चित्रपटातील कैलाश या व्यक्तिरेखेने झाली. पुढे ‘सत्या’ चित्रपटातील कल्लूमामा, ‘जॉली एलएलबी’ चित्रपटातील न्यायाधीश त्रिपाठी, ‘बर्फी’ चित्रपटातील इन्स्पेक्टर सुधांशू दत्ता अशा त्यांच्या कित्येक व्यक्तिरेखा आबालवृद्धांमध्ये लोकप्रिय आहेत. विनोदी अभिनय हा त्यांचा हुकमी एक्का राहिला असला तरी लेखक-दिग्दर्शक म्हणून आपल्याला वास्तविक घटनांशी, वास्तव जीवनाशी आधारित कथा लिहायला, त्यावरचे चित्रपट करायला अधिक आवडते, असं ते सांगतात. त्यांच्या लेखणीतून उतरलेला आणि रामगोपाल वर्मा यांच्या प्रभावी दिग्दर्शनामुळे भारतीय चित्रपटसृष्टीच्या इतिहासात मैलाचा दगड ठरलेला ‘सत्या’ हा चित्रपट त्याचं ठळक उदाहरण म्हणता येईल. शंभरहून अधिक चित्रपटांमध्ये काम केलेल्या या अभिनेत्याने सहावीत असतानाच चित्रपट बनवायचा प्रयत्न केला होता. खरं तर सौरभ शुक्ला यांची आई जोगमया शुक्ला या भारतातील पहिल्या महिला तबलावादक म्हणून ओळखल्या जातात. सौरभ यांना मात्र लहानपणापासूनच चित्रपट आणि नाटकाचं वेड होतं.

हेही वाचा >>>छोटा पडदा गाजवणाऱ्या ‘जुळून येती रेशीमगाठी’ला १० वर्ष पूर्ण! प्राजक्ता माळी म्हणाली, “महाराष्ट्रातील सगळ्या पोरींना…”

आठवडय़ाला एक हिंदी, इंग्रजी चित्रपट पाहणाऱ्या सौरभ शुक्ला यांनी रंगभूमीपासून अभिनयाची सुरुवात केली. १९८६ मध्ये ‘व्ह्यू फ्रॉम द ब्रिज’, ‘लूक बॅक इन अँगर’, ‘घाशीराम कोतवाल’, ‘हयवदन’सारख्या नाटकातून त्यांनी भूमिका केल्या. नाटक करत असतानाच त्यांचं काम दिग्दर्शक शेखर कपूर यांनी पाहिलं आणि त्यांना ‘बँडिट क्वीन’ चित्रपटात पहिली भूमिका मिळाली. हा त्यांच्या आयुष्याला कलाटणी देणारा क्षण असला तरी त्यांच्या चित्रपट कारकीर्दीने खरा वेग पकडला तो १९९८ साली प्रदर्शित झालेल्या ‘सत्या’ चित्रपटाने.. सौरभ शुक्ला यांनी ‘सत्या’ची पटकथा लिहिली होती आणि त्यात भूमिकाही केली होती. त्यांनी ‘कलकत्ता मेल’, ‘चेहरा’, ‘मिथ्या’, ‘सलाम ए इश्क’, ‘पप्पू कान्ट डान्स साला’ यांसारख्या चित्रपटांचं पटकथा लेखन केलं आहे. तर ‘मुद्दा – द इश्यू’, ‘चेहरा’ अशा चित्रपटांचं दिग्दर्शन केलेलं आहे. २०१४ साली प्रदर्शित झालेल्या ‘जॉली एल.एल.बी.’ चित्रपटातील भूमिकेसाठी त्यांना राष्ट्रीय पुरस्कारही मिळाला आहे. ‘द बिग बुल’, ‘शमशेरा’, ‘तडप’, ‘दृश्यम २’, ‘भेडिया’सारख्या अलीकडच्या चित्रपटांतूनही ते आपल्या भूमिकांमधून प्रेक्षकांचं रंजन करत आहेत. त्यांच्या या तीन दशकांच्या वाटचालीतील त्यांचे रंगभूमीवरील आणि चित्रपटातील अनुभव ऐकण्याची संधी ‘लोकसत्ता लोकांकिका’च्या निमित्ताने मिळणार आहे.

First published on: 26-11-2023 at 02:42 IST