‘सेक्रेड गेम्स’ फेम नवाजुद्दिन सिद्दिकीने बॉलीवूडमध्ये आपले वेगळे स्थान निर्माण केले आहे. अभिनेता त्याच्या आगामी चित्रपटात अभिनेत्री अवनीत कौरबरोबर पहिल्यांदाच स्क्रीन शेअर करणार आहे. या दोघांचा ‘टिकू वेड्स शेरू’ हा चित्रपट गेल्या अनेक दिवसांपासून चर्चेत होता. आधी हा सिनेमा चित्रपटगृहांत प्रदर्शित होणार होता परंतु, काही कारणास्तव आता हा चित्रपट निर्मात्यांनी ओटीटीवर प्रदर्शित करण्याचा निर्णय घेतला आहे. बुधवारी (१४ जून) या चित्रपटाचा ट्रेलर अ‍ॅमेझॉन प्राइमवर रिलीज करण्यात आला. ‘टिकू वेड्स शेरू’ चित्रपटाची निर्मिती कंगना राणौतच्या मणिकर्णिका फिल्म्सने केली आहे. या चित्रपटाच्या ट्रेलर लॉंचदरम्यान कंगना, नवाजुद्दिन आणि अवनीत या तिघांनी उपस्थिती लावली अन् चित्रपटाबद्दल वेगवेगळ्या आठवणी आणि अनुभव लोकांसमोर शेअर केले. याच इव्हेंटदरम्यान कंगनाने या चित्रपटाबद्दल आणि दिवंगत अभिनेता इरफान खानशी असलेल्या कनेक्शनबद्दल खुलासा केला. आणखी वाचा : "मंदिरातील देवाला, चर्चमधील येशूला आणि दर्ग्यातील अल्लाहला…" संतोष जुवेकरची 'ती' पोस्ट चर्चेत याबद्दल बोलताना कंगना म्हणाली, "हा चित्रपट माझ्यासाठी डेब्यूसारखाच आहे, शिवाय हा चित्रपट करण्यामागील एक खास कारण आहे, जे मी आजवर कोणालाच सांगितलं नाहीये. खरं तर आधीच या चित्रपटाची घोषणा झाली होती. तब्बल ६ ते ७ वर्षांपूर्वी मी आणि इरफान सर या चित्रपटावर काम करत होतो. त्या वेळी आम्ही मीडियाला आमंत्रित करून एक मोठा कार्यक्रमही आयोजित केला होता. त्या वेळी या चित्रपटाचे नाव 'डिव्हाइन लवर्स' असं होतं. दुर्दैवाने त्यानंतर आमचा दिग्दर्शक आजारी पडला, आम्ही बराच प्रयत्न केला, पण २-३ वर्षं काहीच घडत नसल्याने आम्ही या चित्रपटाचा विचारच सोडून दिला." ‘टिकू वेड्स शेरू’ हा एक कॉमेडी-ड्रामा चित्रपट असून टिकू आणि शेरू ही दोन्ही पात्रं एकमेकांपासून खूप वेगळी आहेत, पण दोघांचंही स्वप्न स्टार होण्याचं आहे. अभिनेता नवाजुद्दिन सिद्दिकीचा नुकताच आलेला ‘जोगीरा सा रा रा’ चित्रपट बॉक्स ऑफिसवर चांगली कामगिरी करू शकला नाही. आता ‘टिकू वेड्स शेरू’ मध्ये अभिनेता पहिल्यांदाच अवनीत कौरबरोबर काम करणार आहे. हा चित्रपट २३ जूनला अ‍ॅमेझॉन प्राइम व्हिडीओवर प्रदर्शित करण्यात येणार आहे.
