सुप्रसिद्ध नृत्यदिग्दर्शिका (कोरिओग्राफर) फुलवा खामकर डान्स प्रशिक्षण सुरु करणार आहे, परंतु हे प्रशिक्षण नेहमी सारखं मर्यादित वेळेपुरतं किंवा एखाद्या नेमक्या जागेवर भरणार नाही. या प्रशिक्षणामध्ये कितीही लोकं सहभागी होऊ शकतात, कोणत्याही वेळी आणि कुठल्याही ठिकाणी कारण. हे प्रशिक्षण असेल इंटरनेटवर.
फुलवा खामकर सुरु करतेय मराठीतलं पहिलं ‘ऑनलाईन डान्स प्रशिक्षण’ राजश्री मराठी वर! मराठीतला असा पहिला शो ज्यामध्ये फुलवा प्रेक्षकांना डान्सचे ऑनलाईन प्रशिक्षण देईल आणि या प्रशिक्षण देणाऱ्या शो चे नाव असेल ‘डान्स विथ फुलवा’. या पहिल्या ऑनलाईन डान्स प्रशिक्षणाबाबत फुलवा म्हणाली की, नृत्यप्रकार ऑनलाइन शिकवणे हा प्रयोग मराठीत पहिल्यांदाच होत आहे. क्लासमध्ये विद्यार्थ्याना शिकवणे आणि ऑनलाइन शिकवणे या दोन्ही गोष्टींमध्ये फरक असला, तरी देखील मी क्लासेसमध्ये जसं साध्या-सोप्या पद्धतीने शिकवते अगदी तसेच इथे शिकवण्याचा प्रयत्न केलाय. मराठी चित्रपटातल्या गाण्यांवर भारतीय आणि पाश्चिमात्य नृत्यप्रकार कसे करता येतील हे मी या शोमध्ये दाखवणार आहे.
‘डान्स विथ फुलवा’चा पहिला एपिसोड शुक्रवार दिनांक १७ मार्च २०१७ रोजी राजश्री मराठी या यूट्यूब चॅनलवर पहायला मिळेल. त्यानंतर दर शुक्रवारी ‘डान्स विथ फुलवा’चे एक-एक एपिसोड तुम्हाला पहायला मिळतील. ज्यात फुलवा खामकर मराठी चित्रपटांच्या लोकप्रिय गाण्यांवर कथ्थक ते कंटेम्पररी पर्यंतचे नृत्य प्रशिक्षण देईल.
महिला दिनाच्या दिवशी ‘फुलवा खामकर’ची प्रेक्षकांना एक डिजिटल भेट देणार आहे. महिला दिनाच्या दिवशी म्हणजेच ८ मार्च २०१७ रोजी फुलवा तुम्हाला तिच्या नवीन शो ची एक झलक दाखवणार आहे. महिला दिनाचं निमित्त स्त्री सशक्तीकरणाचं जरी असलं तरी आपल्यापैकी ब-याच स्त्रिया तो दिवस स्वतःला आवडणाऱ्या गोष्टी करण्यासाठी वापरण्यात घालवणे उत्तम समजतात. आणि त्या आवडत्या कामांपैकी ‘डान्स’ हा नेहमीच आवडणारा भाग. आणि फुलवा तिची हीच कला तुम्हाला तिच्या ‘डान्स विथ फुलवा’ या नवीन शो मध्ये शिकवणार आहे
