जय मल्हार या मालिकेमुळे प्रेक्षकांच्या मनामध्ये स्वतःची वेगळी जागा तयार करणारा अभिनेता देवदत्त नागे सध्या डॉक्टर डॉन या मालिकेमधून आपली अभिनयाची नवी छाप उमटवतोय. झी युवावरच्या या मालिकेमध्ये देवदत्त देवा सुर्वे नावाच्या एका डॉनची व्यक्तिरेखा साकारतोय. यात देवदत्तसोबत अभिनेत्री श्वेता शिंदे डिनच्या भूमिकेत पहायला मिळतेय.
सध्या या मालिकेमध्ये देवदत्त आणि श्वेता यांच्या प्रेमाचा ट्रॅक सुरु झालाय, ज्यात देवा डॉ. मोनिकाच्या प्रेमात पडू लागलाय. मात्र ती अजूनही त्याच्याशी डिनच्या आविर्भावातच वागतेय. आता प्रेमाचे हे रंग मालिकेमध्ये रंगताना त्यात रुसणं फुगणं आहेच पण त्यासोबत नाच गाणे हेही दिसणारे.
मालिकेत आता देवदत्त गोविंदाच्या गाण्यावर थिरकताना दिसणार आहे. राजा बाबू या हिंदी सिनेमातल्या अ आ ई या गोविंदाच्या हिट गाण्यावर देवदत्तला थिरकताना पहाणं ही त्याच्या चाहत्यांसाठी पर्वणीच ठरणार आहे. देवदत्त साकारत असलेल्या देवा हा डॉन चक्क डॉ. मोनिका म्हणजेच श्वेताच्या प्रेमात पडलाय आणि आपल्या या प्रेमाची कबूली देण्यासाठी तो काहीही करायला तयार आहे. याचाच एक भाग म्हणजे देवाचा हा धमाकेदार डान्स.
