अभिनेता कमाल आर. खान उर्फ केआरके आपल्या वादग्रस्त वक्तव्यांमुळे नेहमीच चर्चेत असतो. तो नेहमीच विविध क्षेत्रातील सेलिब्रिटींवर टीका करत असतो. चर्चेत राहुन पैसे कमावण्यासाठी तो अशी विचित्र विधानं करतो, असं म्हटलं जातं. मात्र सातत्याने होणाऱ्या या टीकेवर आता केआरकेने प्रत्युत्तर दिलं आहे. त्याला घर खर्चासाठी पाच कोटी रुपये लागतात असं त्याने म्हटलं आहे. "अनेकजण म्हणतात केवळ पैसे कमावण्यासाठी मी युट्यूब व्हिडीओ करतो. परंतु हे खोटं आहे पैशांसाठी मी व्हिडीओ करत नाही. वर्षाला घर खर्चासाठीच मला पाच कोटी रुपये लागतात. युट्यूबवरुन मिळालेल्या पैशांमध्ये माझं पाण्याचं बिल देखील भरलं जाणार नाही." अशा आशयाचं ट्विट करुन केआरकेने टीकाकारांना प्रत्युत्तर दिलं आहे. For those who always say that I earn money from #Youtube. Lol! I don’t make videos to earn money. My house expenses is ₹5Cr per year. So YouTube earning is not enough for my water bill also. — KRK (@kamaalrkhan) July 23, 2020 केआरकेचं हे ट्विट सध्या सोशल मीडियावर सर्वांचेच लक्ष वेधून घेत आहे. काही तासांत शेकडो नेटकऱ्यांनी यावर आपल्या प्रतिक्रिया दिल्या आहेत. काही जणांनी केआरके खोटं बोलतोय असं म्हणत त्याची खिल्ली देखील उडवली आहे. यापूर्वी त्याने ‘युट्यूब’ विरुद्ध ‘टिक-टॉक’ वादात उडी मारली होती. “मी स्वत:च एक ब्रँड आहे. मी ‘टिक-टॉक’ किंवा ‘युट्यूब’ यांपैकी कोणाचाही बाजूने नाही. मी त्यांच्यापेक्षा श्रेष्ठ आहे. माझी बरोबरी करण्यासाठी या ओटीटी प्लॅटफॉर्म्सला सात वेळा जन्म घ्यावा लागेल. मी कोणाचाही बाजूने नाही किंवा विरोधात नाही. मी तटस्थ आहे.” असं ट्विट त्याने केलं होतं. मात्र या ट्विटमुळे नेटकऱ्यांनी त्याची प्रचंड खिल्ली उडवली होती.
