“नवीन सुरुवात”! अभिनेता गश्मीर महाजनीचं दिग्दर्शनात पदार्पण, सेटवरचे फोटो आले समोर

गश्मीरने आतापर्यंत चित्रपट, हिंदी मालिका, वेब सीरिज व नृत्यामुळे प्रेक्षकांच्या मनात स्वतःचे एक स्थान निर्माण केले आहे. आता गश्मीर लेखक-दिग्दर्शक आणि निर्मात्याच्या भूमिकेत पदार्पण करत आहे. विशेष म्हणजे, त्याच्या वाढदिवसानिमित्ताने त्याने त्याच्या या पहिल्या चित्रपटाच्या मुहूर्ताची सोशल मीडियावर घोषणा केली. जीआरम्स इव्हेंट्स अँड प्रॉडक्शन या निर्मिती संस्थेअंतर्गत या चित्रपटाची निर्मिती होत आहे.

या चित्रपटाचे निर्माते गौरी महाजनी, माधवी महाजनी आणि गश्मीर महाजनी असून लेखन व दिग्दर्शन गश्मीर स्वतः करत आहे. अभिनय क्षेत्रात अनेक वर्षांचा अनुभव असलेला गश्मीर आता कॅमेऱ्यामागे जाऊन एक नव्या प्रवासाला सुरुवात करत आहे. या चित्रपटाचे छायाचित्रण सुप्रसिद्ध डीओपी सत्यजीत शोभा श्रीराम यांच्या कॅमेऱ्यातून साकारले जात आहे. गश्मीरच्या या नव्या इनिंगबद्दल मराठी सिनेसृष्टीतूनही शुभेच्छांचा वर्षाव होत असून या चित्रपटाचं नाव आणि कलाकारांबद्दल जाणून घेण्यासाठी प्रेक्षकांमध्ये प्रचंड उत्सुकता निर्माण झाली आहे.

पाहा पोस्ट

आपल्या या नवीन प्रवासाविषयी गश्मीर महाजनी म्हणाला, “दिग्दर्शन हे माझं एक दीर्घकाळापासूनचं स्वप्न आहे. अभिनय करताना अनेक गोष्टी शिकल्या, अनुभवल्या आणि आत खोलवर काही सांगायचं राहून गेलं होतं. आता त्या भावना, ती विचारांची प्रक्रिया मी कॅमेऱ्याच्या मागून मांडणार आहे. चित्रपट ही एक सामूहिक कला आहे, मात्र काही कथा अशा असतात, ज्या फक्त आपल्या दृष्टिकोनातूनच सांगितल्या जाऊ शकतात. माझा हा चित्रपट म्हणजे माझ्या मनात कित्येक वर्षांपासून रुजत गेलेली कल्पना आहे. वाढदिवसाच्या निमित्ताने ही गोष्ट सुरू करत असल्यामुळे हे एक भावनिक आणि प्रेरणादायी क्षण आहेत. ही जबाबदारी मोठी आहे, परंतु प्रेक्षकांचा विश्वास आणि प्रेम हेच माझं बळ आहे.”

दरम्यान, आपल्या स्पष्टवक्तेपणासाठी ओळखल्या जाणाऱ्या गश्मीरने आतापर्यंत पडद्यावर अभिनय करून प्रेक्षकांचं मनोरंजन केलं, आता तो नव्या भूमिकेत दिसणार आहे. त्याचं दिग्दर्शन असलेल्या या पहिल्यावहिल्या चित्रपटाबद्दल चाहत्यांमध्ये प्रचंड उत्सुकता आहे. त्याच्या चित्रपटात कलाकार कोण असतील, ते अद्याप जाहीर करण्यात आलेलं नाही.