मराठी सिनेसृष्टीतील लोकप्रिय अभिनेत्रींच्या यादीत प्राजक्ता माळी हे नाव कायमच आघाडीवर असते. प्राजक्ता माळीने अभिनयाशिवाय विविध क्षेत्रांमध्ये तिची छाप सोडली आहे. काही महिन्यांपूर्वी तिचा एक काव्यसंग्रह प्रसिद्ध झाला होता. त्यानंतर तिने मराठमोळ्या दागिन्यांचा एक ज्वेलरी ब्रँड लाँच केला होता. आता तिने सोन्याचे दागिने परिधान करण्याचे महत्त्व सांगितले आहे. तिचा एक व्हिडीओ सध्या व्हायरल होताना दिसत आहे.
प्राजक्ता माळी ही सोशल मीडियावर कायमच सक्रीय असते. सध्या तिचा एक व्हिडीओ इन्स्टाग्रामवर व्हायरल होत आहे. या व्हिडीओत ती सोन्याचे दागिने, पैंजण याबद्दल बोलताना दिसत आहे. यावेळी ती म्हणाली, “प्रत्येकाच्या गळ्यात एखादा सोन्याचा अलंकार असावा. अंघोळ करताना त्याचं पाणी अंगावरुन झिरपावं, ते चांगलं असाव. पायात पैंजण किंवा साखळी असावी. तुमच्या शरीराचं तापमान, मासिक पाळीच्या काळात होणारा त्रास यामुळे नियंत्रित करण्यास मदत होते.”
आणखी वाचा : “वैभव तत्त्ववादी माझा…” प्राजक्ता माळीने उघड केले मोठे गुपित
“मी दागिन्यांचा अभ्यास करताना मला विविध गोष्टी समजल्या. यातील अनेक गोष्टी माझ्यासाठीही आश्चर्यकारक होत्या. अलंकार हे केवळ सौंदर्याचे प्रतीक नसून किंवा ते सौंदर्यनिर्मितीसाठी नाही. मानवी शरीरावरही त्याचा खूप परिणाम होतो. त्यामुळे नक्कीच अलंकार घालावेत”, असे प्राजक्ता माळी म्हणाली.
दरम्यान प्राजक्ता माळी ही कायमच विविध कारणांमुळे चर्चेत असल्याचे पाहायला मिळते. तिने आतापर्यंत अनेक मालिका, चित्रपट आणि वेबसीरिजमध्ये काम केले आहे. तिने निवडलेल्या भूमिकांचे कायमच कौतुक होताना दिसते. ती लवकरच एका चित्रपटात झळकणार आहे. मात्र याचे नाव अद्याप जाहीर करण्यात आलेले नाही.
प्राजक्ताने ‘प्राजक्तराज’ स्वत:चा असा दागिन्यांचा ब्रँड सुरू केला. जानेवारी २०२३ मध्ये मनसे अध्यक्ष राज ठाकरे यांच्या हस्ते या ब्रँडचे अनावरण करण्यात आले होते. या दागिन्यांच्या कलेक्शनमध्ये सोनसळा (इमिटेशन दागिने), म्हाळसा (चांदीचे दागिने) आणि तुळजा (सोन्याचे दागिने) अशा श्रेणीतील दागिने उपलब्ध आहेत.
