#MeToo या मोहिमेअंतर्गत अनेक सेलिब्रेटींवर लैंगिक शोषण आणि मानसिक छळ केल्याचे आरोप करण्यात आले आहेत. यामध्ये दिग्दर्शक सुभाष घई यांच्या नावाचाही समावेश आहे. एका अज्ञात महिलेने घई यांच्यावर बलात्काराचा आरोप केला होता. त्यानंतर अभिनेत्री केट शर्मानेदेखील घईंवर आरोप करत त्यांच्या विरोधात पोलीस तक्रार दाखल केली आहे.

‘सुभाष घई यांनी मला ६ ऑगस्ट रोजी त्यांच्या घरी कामानिमित्त बोलावलं होतं. घईंचा फोन आल्यानंतर मी तात्काळ तेथे गेले. त्यानंतर सुभाष यांनी मला महत्वाच्या विषयावर बोलायचं आहे असं सांगत एका खोलीत घेऊन गेले आणि तेथे बळजबरीने माझे चुंबन घेण्याचा प्रयत्न केला’, असा आरोप केटने घईंवर केल्याचं ‘एएनआय’च्या वृत्तात म्हटलं आहे. केटने या प्रकरणी पोलीस तक्रार दाखल केली आहे.

दरम्यान, यापूर्वी एका महिलेने सुभाष घई यांच्यावर बलात्काराचा आरोप केला आहे. परंतु तिने नाव गोपनीय ठेवण्याची अट ठेवली आहे. सुभाष घई यांनी अनेक वेळा घरी सोडण्याच्या निमित्ताने माझ्याशी लगट करण्याचा प्रयत्न केला आहे, असा आरोप या महिलेने केला आहे.