दिग्दर्शक नागराज मंजुळे यांचा ‘सैराट’ या चित्रपटातून नावारुपाला आलेली रिंकू राजगुरू लवकरच ‘मेकअप’ या चित्रपटात झळकणार आहे. सध्या या चित्रपटामध्ये ती व्यस्त असून यात तिच्यासोबत अभिनेता चिन्मय उदगीरकर स्क्रीन शेअर करणार आहे. अलिकेडच या चित्रपटातील एक पोस्टर प्रदर्शित झालं असून हे पोस्टर अनेकांचं लक्ष वेधून घेत आहे.
रिंकूच्या ‘मेकअप’चे प्रतिबिंब आपण ‘मेकअप’च्या पहिल्या पोस्टरमध्ये पाहिले होतं. त्यामुळे या चित्रपटाविषयीची उत्सुकता कमालीची वाढली होती. त्यातच या चित्रपटाचं दुसरे पोस्टर प्रदर्शित करण्यात आलं आहे. विशेष म्हणजे या पोस्टरमधून चिन्मयच्या भूमिकेवरील पडदा दूर झाला आहे. या चित्रपटात तो डॉक्टरांच्या रुपात पाहायला मिळणार आहे.
प्रदर्शित झालेल्या पोस्टरमध्ये चिन्मय डॉक्टरांच्या वेशभूषेत असून स्टेट्स्कोप घेऊन ‘पूर्वी’चे म्हणजेच रिंकूचे डोके तपासताना दिसत आहे. त्यामुळे खरी ‘पूर्वी’ कोणती हे शोधण्यासाठी चिन्मय तिला तपासात नसावा ना? असा प्रश्न निर्माण होत आहे. दोन वेगवेगळी रूपे घेऊन वावरणाऱ्या ‘पूर्वी’ला कोणत्या गोष्टीमुळे असे सोंग करावे लागत आहे हे आपल्याला चित्रपट पाहिल्यावर समजेलच. तत्पूर्वी चिन्मय ‘पूर्वी’ला तिच्या या सोंगात मदत करणार की त्याला विरोध करणार हे बघण्यासाठी आपल्याला थोडी वाट पाहावी लागणार आहे.
वाचा : Video : दीपिका पदुकोणने प्रिया वारियरला दिलं चॅलेंज!
सोहम रॉकस्टार एंटरटेनमेंट, बाला इंडस्ट्रीज अँड एंटरटेनमेंट प्रा. लि., शेमारू एंटरटेनमेंट लि. निर्मित आणि ग्रीन ॲपल मीडिया प्रस्तुत ‘मेकअप’ या चित्रपटात रिंकू राजगुरू सोबतच चिन्मय उदगीरकर प्रमुख भूमिकेत दिसणार आहे. दीपक मुकूट, बी. बालाजी राव, हिरेन गाडा, नीरज कुमार बर्मन, अमित सिंग यांनी या चित्रपटाची निर्मिती केली असून केतन मारू, कलीम खान सहनिर्माता आहेत. गणेश पंडित दिग्दर्शित, लिखित ‘मेकअप’ हा चित्रपट लवकरच प्रेक्षकांच्या भेटीला येणार आहे.
