‘पुष्पा’ चित्रपटामुळे लोकप्रिय ठरलेली अभिनेत्री म्हणजे रश्मिका मंदाना, दाक्षिणात्य चित्रपटातील आघाडीची अभिनेत्री म्हणून तिच्याकडे पहिले जाते. नॅशनल क्रश बनलेली रश्मिका नेहमीच काही ना काही कारणांमुळे चर्चेत असते. दाक्षिणात्य चित्रपटानंतर आता तिने बॉलिवूडमध्ये पदार्पण केले. रश्मिकाचा ‘गुडबाय’ चित्रपट प्रदर्शित झाला आहे. या चित्रपटात तिने पहिल्यांदा अमिताभ बच्चन याच्याबरोबर काम केले मात्र या चित्रपटाला फारसे यश मिळाले नाही. खरं तर रश्मिका वेगळ्या चित्रपटातून पदार्पण करणार होती. सिद्धार्थ मल्होत्रा सह ती 'मिशन मंजू’ या चित्रपटाद्वारे बॉलिवूडमध्ये पदार्पण करणार होती मात्र चित्रपटाची घोषणा डिसेंबर २०२० मध्ये करण्यात आली होती. तसेच हा चित्रपट चित्रपटगृहात प्रदर्शित करण्यात येणार होता. मात्र निर्मात्यांनी आता निर्णय बदलला असून ते आता ओटीटी माध्यमावर प्रदर्शित करणार आहेत. पाकिस्तानच्या अवैध आण्विक महत्त्वाकांक्षा आणि भारतीय गुप्तचर संस्थेचे मिशन यावर आधारित हा चित्रपट असणार आहे असे सिद्धार्थ मल्होत्राने सांगितले होते. 'मिशन मंजू' हा जून २०२२ मध्ये पडद्यावर येणार होता, परंतु उशीर झाला आणि आता निर्मात्यांनी आपले निर्णय बदलले आहेत. शंतनू बागची दिग्दर्शित हा चित्रपट पिंकव्हिलाच्या सूत्रानुसार १८ जानेवारी रोजी नेटफ्लिक्सवर प्रदर्शित होणार आहे.बॉलिवूडमध्ये तिला अपयश जरी आले असले तरी सध्या ती ‘पुष्पा २ चित्रीकरणात व्यस्त आहे. रश्मिकाने २०१६ मध्ये ‘किरिक पार्टी’ (Kirik Party) या कन्नड चित्रपटाच्या माध्यमातून कारकीर्दीची सुरुवात केली होती.
