संजय लीला भन्साळी यांच्या बहुप्रतिक्षिती 'हीरामंडी' या सीरिजची खूप चर्चा आहे. ही सीरिज १ मे रोजी नेटफ्लिक्स या ओटीटी प्लॅटफॉर्मवर प्रदर्शित झाली. या सीरिजला मिश्र प्रतिसाद मिळत आहे. अशातच यातील एका अभिनेत्याची व त्याच्या अभिनयाची खूप चर्चा होताना दिसत आहे. या अभिनेत्याने सीरिजपूर्वी काही चित्रपटांमध्ये काम केलंय व मॉडेलिंग देखील केलं आहे. पण त्याला खरी ओळख ओटीटीमुळे मिळाली. अबुधाबीचा आहे अभिनेता आपण 'हीरामंडी' सीरिजमधील ज्या अभिनेत्याबद्दल बोलत आहोत त्याचं नाव आहे ताहा शाह बदुशा. ताहाने अनेक वर्षे इंडस्ट्रीत संघर्ष केला आणि त्यानंतर आज त्याला ही ओळख मिळाली आहे. ताहा शाह हा मुळचा अबुधाबीचा आहे. त्यांचे कुटुंब सुशिक्षित आहे. ताहाने शालेय शिक्षणानंतर बिझनेस अॅडमिनिस्ट्रेशन प्रोग्रामसाठी प्रवेश घेतला होता, पण एका सेमिस्टरनंतर त्याने शिक्षण सोडलं. त्याला अभिनयाची आवड होती, त्यासाठी तो आई-वडिलांची परवानगी घ्यायला त्यांची मनधरणी करत होता. यादरम्यान त्याने अनेक व्यवसायही केले आणि मग त्याने मॉडेलिंग सुरू केले. हेही वाचा – प्रसिद्ध अभिनेत्याच्या मुलीचं लग्न थाटात पडलं पार, चार्टर्ड अकाउंटंट आहे जावई, पाहा सोहळ्याचे Photos श्रद्धा कपूरबरोबर पहिला चित्रपट, नंतर कतरिनासह केलं काम मॉडेलिंग करत असताना ताहा मुंबईत शिफ्ट झाला. त्याने मायानगरीत आल्यावर अभिनय शाळेत प्रवेश घेतला. मुंबईत आल्यानंतर अवघ्या नऊ महिन्यांतच त्याला त्याचा पहिला चित्रपट 'लव्ह का द एंड' ची ऑफर मिळाली. या चित्रपटात त्याने श्रद्धा कपूरसोबत काम केलं होतं. पण हा चित्रपट बॉक्स ऑफिसवर सपशेल आदळला होता. यानंतर ताहाने अनेक चित्रपटांमध्ये काम केलं पण त्याला पाहिजे तशी ओळख मिळाली नाही. ताहाने कतरिना कैफसह 'बार बार देखो' मध्येही काम केलं होतं, पण हा चित्रपटही बॉक्स ऑफिसवर कमाल करू शकला नव्हता. अशा रितीने त्याचे श्रद्धा व कतरिनाबरोबरचे सिनेमे फ्लॉप ठरले. हेही वाचा – कंगना रणौतने प्रचारसभेत अमिताभ बच्चन यांच्याशी केली स्वतःची तुलना; नेटकऱ्यांना हसू आवरेना, म्हणाले, “हिचा शेवटचा…” ओटीटीने मिळवून दिली ओळख चित्रपट केले, पण फारसं यश न मिळाल्याने ताहाने ओटीटीवर पदार्पण केलं. त्याने एकता कपूरच्या 'बेकाबू २' मध्ये काम केले होते. त्यानंतर तो 'ताज: डिव्हाइड बाय ब्लड'मध्ये झळकला होता. यामध्ये त्याने मुराद नावाची भूमिका साकारली होती. या भूमिकेसाठी त्याचं खूप कौतुक झालं. आता ताहा संजय लीला भन्साळींच्या 'हीरामंडी'मध्ये ताजदार बलोचच्या भूमिकेत पाहायला मिळाला. ही सीरिज प्रदर्शित झाल्यापासून ताहाच्या सोशल मीडिया फॉलोइंगमध्ये मोठी वाढ झाली आहे. अभिनेता इंटरनेट क्रश झाला आहे.