बिग बॉस फेम शहनाझ गिलच्या आयुष्यातील समस्या संपण्याचं नावच घेत नाही आहेत. एकीकडे सिद्धार्थ शुक्लाच्या निधनानंतर हळूहळू शहनाज सामान्य आयुष्य जगण्याचा प्रयत्न करत आहे. अशात आता शहनाझचे वडील संतोख सिंह सुख यांच्यावर जीवघेणा हल्ला झाला आहे. अमृतसरवरून ब्यास येथे जात असताना शहनाझच्या वडीलांवर दुचाकीस्वारांनी हल्ला केला. मिळालेल्या माहितीनुसार शहनाझचे वडील अमृतसर ते ब्यास असा प्रवास करत होते. दरम्यान त्यांनी एका धाब्यावर आपली गाडी थांबवली. त्यावेळी काही दुचाकीस्वारांनी त्यांच्यावर गोळीबार करत जीवघेणा हल्ला केला. शहनाझचे वडील संतोख सिंह सुख यांनी सांगितलं, ‘मी वॉशरुमला जाण्यासाठी एका धाब्याजवळ गाडी थांबवली. माझे बाउंसरही माझ्यासोबत होते. तेवढ्यात एक दुचाकी माझ्या बाजूने आली आणि या दुचाकीवरील युवकांनी माझ्यावर गोळीबार केला. हे पाहिल्यावर माझे बाउंसर धावत आले पण तोपर्यंत ते युवक पळून गेले होते.’ दरम्यान या जीवघेण्या हल्ल्यातून शहनाझ गिलचे वडील बचावले आहेत. पण त्यांचं म्हणणं आहे की, याबाबत पोलिसांनी मात्र कोणतीही कारवाई केलेली नाही. तर पोलिसांचं म्हणणं आहे की, संतोख सिंह सुख यांनी तक्रार दाखल केली आहे आणि त्यानुसार कारवाईला सुरुवात केली आहे. विशेष म्हणजे शहनाझच्या वडिलांनी काही दिवसांपूर्वी भाजपमध्ये प्रवेश केला आहे.
