सोनी टीव्हीवरील लोकप्रिय क्विज शो ‘कौन बनेगा करोडपती’चा आगामी एपिसोड खूपच खास असणार आहे. ११ ऑक्टोबरला महानायक अमिताभ बच्चन यांचा ८० वाढदिवस साजरा करत आहेत. त्यांचा वाढदिवस केबीसीच्या सेटवर खास पद्धतीने साजरा करण्यात येणार आहे. नुकताच सोनी टीव्हीने एक प्रोमो प्रेक्षकांच्या भेटीला आणला आहे. ज्यात बिग बी अमिताभ बच्चन त्यांचा मुलगा अभिषेक बच्चनसह हॉट सीटवर बसलेले दिसत आहे. तर पत्नी जया बच्चन त्यांना प्रश्न विचारताना दिसत आहेत. केबीसीचा हा प्रोमो सध्या सोशल मीडियावर चांगलाच चर्चेत आहे.
सोनी टीव्हीच्या अधिकृत इन्स्टाग्राम हॅन्डवर हा प्रोमो शेअर करण्यात आला आहे. जो खूपच मजेदार आहे. या प्रोमोमध्ये जया बच्चन पती अमिताभ बच्चन यांची कधी फिरकी घेताना तर कधी त्यांच्याबद्दल तक्रार करताना दिसत आहेत. अमिताभ बच्चन मात्र बायकोच्या तक्रारी ऐकून अवाक झालेले पाहायला मिळत आहेत. अमिताभ आणि जया बच्चन यांचा हा व्हिडीओ खूप व्हायरल झाला आहे.
आणखी वाचां- अमिताभ बच्चन यांच्यावर प्रेम होतं का? प्रश्नावर रेखा म्हणाल्या होत्या, “मला आजपर्यंत असा पुरुष…”
या प्रोमोमध्ये जया बच्चन बिग बींना सांगतात, “मी पाहिलं तर नाही पण मी अनेकदा ऐकलं आहे. जेव्हा तुम्ही एखाद्या व्यक्तीचं काम पाहून प्रभावित होता, तेव्हा त्यांना फुलं पाठवता किंवा चिठ्ठी लिहिता. पण मला आजपर्यंत अशी चिठ्ठी लिहिलेली नाही किंवा फुलंही पाठवलेली नाही. तुम्ही पाठवली आहेत का कधी?” जया यांच्या या तक्रारीनंतर बिग बी अवाक होतात आणि म्हणतात, “अरे हे सर्व सार्वजनिक होतंय… ही तर चुकीची गोष्ट आहे यार.” यावर त्यांचा मुलगा अभिषेक बच्चन म्हणतो, “अजिबात नाही… पुढे- पुढे काय होईल तुम्हाला कळणारच आहे.”
आणखी वाचा- Video : “त्यांचा आदर करा” वडिलांबाबत ऐकताच अभिषेक बच्चनला राग अनावर, शो सोडून निघून गेला अन्…
दरम्यान केबीसीचा आगामी एपिसोड बिग बी अमिताभ बच्चन वाढदिवस स्पेशल असणार आहे. यानिमित्ताने केबीसीच्या मंचावर बच्चन कुटुंबाने हजेरी लावली असून याचे आणखी काही प्रोमो सोशल मीडियावर व्हायरल झाले आहे. ज्यात अमिताभ बच्चन काहीसे भावूक झालेले दिसले होते. याशिवाय या एपिसोडमध्ये जया बच्चन, अमिताभ बच्चन आणि अभिषेक बच्चन धम्माल करताना दिसणार आहेत.
