'कलर्स मराठी' वाहिनीवरील अभिनेत्री स्पृहा जोशीची नवी मालिका 'सुख कळले' लवकरच प्रेक्षकांच्या भेटीस येत आहे. या मालिकेत स्पृहासह अभिनेता सागर देशमुख, ज्येष्ठ अभिनेते सुनील गोडबोले, बालकलाकार मिमी खडसे पाहायला मिळणार आहेत. नुकताच या मालिकेचा नवा प्रोमो समोर आहे; ज्याची सध्या चांगलीच चर्चा सुरू आहे. या मालिकेत महाराष्ट्राचे लाडके भावोजी आदेश बांदेकर व अभिनेत्री सुचित्रा बांदेकर यांचा लेक सोहम एक महत्त्वाच्या भूमिकेत असणार आहे. सोहम बांदेकरने ‘नवे लक्ष्य’ या मालिकेतून अभिनय क्षेत्रात पदार्पण केलं होतं. त्यानंतर तो ‘बाईपण भारी देवा’ या चित्रपटात झळकला होता. या चित्रपटातील त्याच्या भूमिकेची चांगलीच चर्चा रंगली होती. आता सोहम स्पृहा जोशीच्या नव्या मालिकेत एक महत्त्वाची जबाबदारी सांभाळणार आहे. हेही वाचा - ‘आई कुठे काय करते’मधील अभिनेता झळकला ‘नवरी मिळे हिटलरला’ नव्या मालिकेत, साकारतोय ‘ही’ महत्त्वाची भूमिका सोहम सध्या अभिनयासह निर्मितीची धुराही सांभाळताना दिसत आहे. ‘सोहम प्रोडक्शन हाऊस’ याचं काम सोहम पाहत आहे. या प्रोडक्शन हाऊसच्या सध्या दोन मालिका 'ठरलं तर मग', 'घरोघरी मातीच्या चुली' या मालिका सुरू आहेत. आता याचं प्रोडक्शन हाऊसची आणखी एक मालिका प्रेक्षकांच्या भेटीस येत आहे. ती म्हणजे स्पृहाची 'सुख कळले' मालिका. त्यामुळे या मालिकेत सोहम निर्मित्याच्या भूमिकेत असणार आहे. हेही वाचा - Video: स्पृहा जोशी-सागर देशमुखच्या ‘सुख कळले’ मालिकेचा नवा प्रोमो प्रदर्शित, कधीपासून सुरू होणार? जाणून घ्या… दरम्यान, सोहम ‘नवे लक्ष्य’ या मालिकेपूर्वीपासून निर्मितीची जबाबदारी सांभाळत आहे. त्याने ‘स्टार प्रवाह’ वाहिनीवर ‘ललित २०५’ या मालिकेच्या निर्मितीची धुरा सांभाळली होती. या मालिकेत ज्येष्ठ अभिनेत्री सुहास जोशी, संग्राम समेळ, अमृता पवार, अनिकेत केळकर, सागर तळशीकर महत्त्वाच्या भूमिकेत होते. या मालिकेनंतर सोहमने अभिनय क्षेत्राकडे वळण्याचा निर्णय घेतला होता.
