‘उर्मिलायन’ महाकाव्यातून उलगडणार रामायणातील लक्ष्मणच्या पत्नीचं कथाख्यान, ‘या’ दिवशी होणार शुभारंभाचा प्रयोग

उर्मिला ही वाल्मिकी रामायणातली उपेक्षित व्यक्तिरेखा

उर्मिला…वाल्मिकींच्या रामायणातली एक उपेक्षित व्यक्तिरेखा. रामायणातील राम, सीता आणि रावण या तीन व्यक्तिरेखांच्या भाऊगर्दीत उर्मिला ही व्यक्तिरेखा काहीशी अबोलच राहिली. या व्यक्तिरेखेला बोलतं करणार आणि उर्मिलेच्या बाबतीतील असंख्य प्रश्नांच्या उत्तरांचा शोध ‘उर्मिलायन’ या नाटकातून घेण्यात येणार आहे. १६ कलाकारांच्या संचाने हे नाटक सजलं आहे. नाटकाचे नेपथ्य अरुण राधायण तर संगीत निनाद म्हैसाळकर यांचे आहे.

हे पण वाचा- ‘महाराष्ट्राची हास्यजत्रा’मधील कलाकारांचं नवं नाटक लवकरच रंगभूमीवर; नम्रता संभेराव, प्रसाद खांडेकरसह दिसतील ‘हे’ कलाकार

उर्मिलायन नाटकाचा विषय नेमका काय?

देवत्वाच्या स्पर्शापासून वंचित राहिलेली आणि कदाचित त्यामुळेच माणूसपणाच्या सगळ्या भावभावना आसक्तीने जगणारी एक हाडामांसाची जिवंत व्यक्ती म्हणून तिचा अभ्यास केला, तर ही अनन्यसाधारण व्यक्तिरेखा हृदयात अगदी खोलवर घाव करू लागते, जिची काहीही चूक नसतानासुद्धा जिला पती असतानाही विनाकारण वनवास भोगावा लागला, या चौदा वर्षांच्या खडतर जीवनप्रवासात जगण्याचा आणि स्वतःला जागवण्याचा संघर्ष कसा केला असेल ? काय घडलं असेल तिच्या शापित कथायुष्यात? काय असतील तिचे प्रश्न जे मानवी जीवनाला दर्शनस्वरूप मूल्य देणारे असतील, काय असेल तिच्या या जीवन प्रवासाचं आयन ? मानवी अस्तित्वाच्या मुळापर्यंत भिडू पहाणार्‍या या अनादी अनंत प्रश्नांचा भेदक चेहरा म्हणजे ‘उर्मिलायन’

उर्मिलायन नाटकातले कलाकार कोण?

कल्पिता राणे, पुजा साधना, श्रावणी गावित, मृणाल शिखरे,निकिता रजक, सुप्रिया जाधव, प्रियांका अहिरे, अमोल भारती, शिवानी मोहिते, अजय पाटील, शुभम बडगुजर, पराग सुतार, दिवेश मोहिते सोहम पवार,प्रणव चव्हाण आणि उर्मिलेच्या भूमिकेत निहारिका राजदत्त हे कलाकार दिसणार आहे. ‘उर्मिलायन’ प्रेक्षकांना एक सुंदर नाट्यानुभव देईल अशी खात्री निर्माता दिग्दर्शकांनी व्यक्त केली आहे.