बॉलिवूड सिनेमांचा इतिहास चाळून पाहिला तर असे अनेक अजरामर संवाद आहेत जे तेव्हाही हिट होते आणि ते आजही हिट आहेत. या संवादांचे चाहते फक्त भारतातच नव्हे, तर परदेशातही बॉलिवूडकरांचे लाखो चाहते आहेत. तुम्हाला जर विश्वास बसत नसेल तर आम्ही आज तुम्हाला असा एक व्हिडिओ दाखवणार आहोत जो पाहून तुम्हालाही आमचं म्हणणं पटेल. अमेरिकन दुतावासातही बॉलिवूडची क्रेझ पाहायला मिळत आहे. अमेरिकन दुतावासातील काही कर्मचाऱ्यांनी बॉलिवूडमधील काही हिट सिनेमांचे संवाद जसेच्या तसे बोलून दाखवले. कोणत्याही अमेरिकन व्यक्तिंनी अशा अस्खलित हिंदीमध्ये बॉलिवूडचे संवाद म्हटले नसतील. नवी दिल्ली येथील अमेरिकन दुतावास बॉलिवूडमय झाले होते. या दुतावासाने त्यांच्या अधिकृत ट्विटर अकाऊंटवरुन एक व्हिडिओ शेअर केला आहे. या व्हिडिओमध्ये अमेरिकन कर्मचारी बॉलिवूडमधील अजरामर संवाद म्हणताना दिसत आहेत. अमिताभ बच्चन यांच्या 'नमक हलाल' सिनेमातील 'आय कॅन वॉक इंग्लिश', 'शोले'मधील, 'कितने आदमी थे', 'शहेनशहा'मधील 'रिश्ते में तो हम तुम्हारे बाप लगते हैं', 'ओम शांती ओम'मधील एक चुटकी सिंदूर की किंमत' यासारखे अनेक संवाद अभिनयासह म्हणून दाखवले आहेत. हा व्हिडिओत बॉलिवूड सिनेमांसाठी ऑडिशन सुरू असल्याचे भासवण्यात आले आहे. या व्हिडिओवर ट्विटर युजर्स कोणाचा अभिनय आवडला हे त्यांना मानांकन देऊन सांगूही शकतात. त्याचे झाले असे की, अमेरिका आणि भारतातील नागरिकांना जवळ आणण्यासाठी अमेरिकी दुतावासाने हा खास व्हिडिओ तयार केला आहे. कर्मचाऱ्यांनी या व्हिडिओला 'युएस इंडिया दोस्ती' या नावाने हॅशटॅग देऊन शेअर केले आहे. काही महिन्यांपूर्वी अमेरिकन दुतावासाने असाच एक व्हिडिओ शेअर केला होता ज्यात मॅरिके कार्लसन यांनी साडी नेसली होती. कार्लसन यांना भारताच्या स्वातंत्र्य दिनाचे औचित्य साधत साडी नेसायची होती. यासाठी त्यांनी ट्विटरवर युजर्सना चांगली साडी कोणती असा प्रश्न विचारला होता.