मासुंदाच्या काठी तरुणाईचा जल्लोष

डोंबिवलीतील फडके रस्त्यावर एकीकडे तरुणाईचा जल्लोष होत असताना ठाण्यातील मासुंदा तलावाच्या काठी तरुणाईचा उत्साह ओसंडून वाहत होता. ठाण्यातील तलावपाळी परिसरात यंदा दिवाळीच्या निमित्ताने तरुणाई एकवटल्याचे पाहायला मिळाले. यंदाच्या दिवाळी जल्लोषात पारंपरिक ढोलताशा पथकांच्या वादनासोबत पाश्चिमात्य ‘रॉक बॅण्ड’ची सुरावटही तरुण कलाकारांकडून आळवली जात होती. या पाश्चिमात्य सुरावटींची भुरळ पडलेल्या अनेक तरुणांची तलावपाळीच्या रस्त्यावर फेर धरला होता. त्यामुळे ठाण्यातील दिवाळी जल्लोषाला पारंपरिकते बरोबरच पाश्चिमात्य नृत्य आणि संगीताची किनार लाभली होती.
दिवाळीच्या शुभेच्छा देण्यासाठी पहाटेपासूनच ठाणे शहरातील विविध भागातील तरुण तलावपाळीच्या दिशेने निघाले होते. पारंपरिक कुर्ता-पायजमा, पठाणी, शेरवानीचा पोशाख परिधान केलेल्या तरुणांचे जथे या ठिकाणी अवतरले होते. तरुणींमध्ये पारंपरिक नऊवारी, अनारकली कपडय़ांना विशेष स्थान दिल्याचे दिसून येत होते. राम-मारुती रस्ता, गोखले रस्ता, बी-केबीन, स्थानक परिसर आणि तलावपाळी परिसर अशा सगळ्याच भागामध्ये तरुणाईची गर्दी उसळली होती. तरुणांसोबत पुरुष आणि महिला वर्गाचाही सहभाग लक्षणीय होता. ज्येष्ठ नागरिकांचे काही कट्टेकरीही या उत्साहात सहभागी झाले होते. दुचाकी वाहने घेऊन तर काही तरुण चालतच तलावपाळीच्या आवारामध्ये दाखल होत होते. शुभेच्छा देण्याबरोबरच ‘ग्रुफी’ काढण्यामध्येही ही मंडळी दंग झाली होती. एखाद्या मित्राला यायला उशीर झाल्यास त्याला फोन करून चौकशीही केली जात होती. कार्यक्रमांची रेलचेल, शुभेच्छांची देवघेव आणि भेटीचा आनंद यामुळे एकूच दिवाळीच्या निमित्ताने तलावपाळी परिसरातील रस्ता दुमदुमून गेला होता.