News Flash

‘शिवस्मारकाचा छळ करणाऱ्यांनाही ‘पटकून’ टाका’; शिवसेनेची भाजपवर बोचरी टीका

शिवस्मारकाच्या कामात सतत अडथळे येत आहेत. याचा अर्थ सरकार याबाबत अजिबात गंभीर नाही, अशीही टीकादेखील करण्यात आली आहे.

(संग्रहित छायाचित्र)

अरबी समुद्रात होऊ घातलेल्या शिवस्मारकाचे काम सर्वोच्च न्यायालयाने थांबवण्याचे आदेश दिले. छत्रपती शिवाजी महाराज हे महाराष्ट्राचे आराध्य दैवत आहेत. त्यांच्या स्मारकाला सतत अडचणी येत आहेत. सध्या काही तांत्रिक बाबी यात अडसर ठरत आहेत. याचा अर्थ सरकार याबाबत अजिबात गंभीर नाही आणि कोर्ट कचेऱ्यांच्या आडून कोणी तरी हे स्मारक होऊ नये, यासाठी प्रयत्न करत आहे. भाजपला आडवे येतील त्यांना ‘पटकून’ टाकू अशी भाषा वापरणाऱ्यांचे राज्य महाराष्ट्रात आहे. तर मग शिवस्मारकाचा छळ करणाऱ्या या लोकांनाही भाजपने ‘पटकून’ टाकावे, अशी बोचरी टीका शिवसेनेने ‘सामना’तून केली आहे. काही दिवसांपूर्वी भाजप अध्यक्ष अमित शाह यांनी भाजपला साथ न देणाऱ्यांना पटकून टाकू असे वक्तव्य केले होते. त्यावर ‘सामना’च्या अग्रलेखातून निशाणा साधण्यात आला आहे.

‘सामना’च्या अग्रलेखात म्हटले आहे की अरबी समुद्रातील शिवस्मारकाचे काम सर्वोच्च न्यायालयाने पुन्हा एकदा थांबवले आहे. हे वारंवार घडत आहे. शिवस्मारक उभारणीबाबत सरकार गंभीर आहे काय? हा प्रश्न त्यामुळे निर्माण झाला आहे. गुजरातमध्ये नर्मदेच्या तीरावर सरदार वल्लभभाई पटेल यांचा जागतिक उंचीचा पुतळा उभा राहिला. तेथे ना पर्यावरणाची समस्या निर्माण झाली ना कोणता तांत्रिक मुद्दा आडवा आला. केंद्राने सवर्णांना १० टक्के आरक्षण खास घटना दुरुस्ती करून बहाल केले. मुस्लिम महिलांसाठी तिहेरी तलाकचा विषयही घटनेत बदल करून संपवला, पण अयोध्येत राममंदिर होत नाही व मुंबईच्या अरबी समुद्रात शिवरायांचे स्मारक होत नाही. तेथे न्यायालय आडवे येते की न्यायालयाची ढाल पुढे करून कोणी ही स्मारके होऊ देत नाही? शिवस्मारकाच्या उभारणीत विघ्ने येत आहेत व सरकार त्यावर मूग गिळून बसले आहे. ३६०० कोटी रुपयांचा हा भव्य प्रकल्प आहे, पण पहिल्या दिवसापासून सरकार या कार्याबाबत गंभीर नाही.

शिवस्मारकाची बाजू मांडण्यात सरकारचे अधिकारी कमी पडल्याचा आरोप शिवस्मारक समितीचे अध्यक्ष विनायक मेटे यांनी केला आहे. त्यांच्या या प्रश्नाचे उत्तर सरकारनेच द्यायचे आहे. शिवस्मारकाची बाजू मांडण्यास सरकार कमी का पडत आहे? हा प्रश्न आता सर्वोच्च न्यायालयाच्या स्थगितीमुळे पुन्हा ऐरणीवर आला आहे. इतर सर्व राजकीय चढाओढीत राज्य सरकार कुठेच कमी पडत नाही. निवडणुकांत विजय विकत घेण्यापासून इतर सर्व व्यवहारांत सरकार कमी पडले नाही. पण प्रश्न सीमाबांधवांच्या न्यायालयीन लढय़ाचा असो अथवा शिवस्मारकाच्या कायदेशीर बाबींचा, सरकार नेमके इथेच का कमी पडत आहे? शिवस्मारकाच्या प्रकल्पासाठी राज्य सरकारच्या विनंतीवरून केंद्र सरकारने २०११ मध्ये सीआरझेड नियमावलीत दुरुस्ती केली. (तेव्हा भाजपचे राज्य नव्हते.) या दुरुस्तीला ‘द कन्झर्वेशन ऍक्शन ट्रस्ट’ने मुंबई उच्च न्यायालयात आव्हान दिले. तेव्हापासून ही याचिका शिवस्मारकास छळत आहे. एरवी सरकार राजकीय निर्णय वेगाने घेते, पण इथे हलगर्जीपणाच आहे. भाजपला आडवे येतील त्यांना ‘पटकून’ टाकू अशी भाषा वापरणाऱ्यांचे राज्य महाराष्ट्रात आहे. मग शिवस्मारकाचा छळ करणाऱ्यांनाही पटकून टाका.

 

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on January 18, 2019 6:00 am

Web Title: finish people who are coming in the way of shivaji maharaj statue making process in arabian ocean shivsena slams bjp
Next Stories
1 घाटकोपरमध्ये ट्रकच्या धडकेत पिता-पुत्राचा मृत्यू; संतप्त रहिवाशांचा रास्ता रोको
2 डान्सबार बंद नव्हतेच!
3 उत्सव शांततेत; वाहतूक कानठळीच!
Just Now!
X