विरोधात लढलो तरी अडवाणी, वाजपेयींचा काँग्रेसकडून आदर: राहुल गांधी

वाजपेयी जी जरुर हमारे खिलाफ लड़े लेकिन उन्होंने हिंदुस्तान के लिये काम किया, और अगर आज वो बीमार हैं तो हम उनके साथ खड़े होंगे ये हमारा इतिहास है, हमारा धर्म है : कांग्रेस अध्यक्ष @RahulGandhi #RahulGandhiInMumbai

— Congress (@INCIndia) June 12, 2018

मुंबई येथे बूथस्तरावरील कार्यकर्त्यांच्या मेळाव्यात ते बोलत होते. यावेळी त्यांनी भाजपावर टीका करण्याबरोबर काँग्रेस कार्यकर्त्यांचे मनोबल वाढवण्याचाही प्रयत्न केला.

अनेकवेळा अडवाणी यांची विविध कार्यक्रमात भेट होते. त्या प्रत्येकवेळी मी त्यांचा सन्मान करतो. माझ्यापुढे त्यांना उभा करतो. त्यांचा आदर करतो. काँग्रेसची ही संस्कृतीच आहे. कारण आपल्याकडे गुरू हे मोठे असतात. अटलबिहारी वाजपेयी सध्या आजारी आहेत. तिथेही मी प्रथम जाऊन त्यांच्या तब्येतीची विचारपूस केली. याउलट भाजपाचे असून हाच काँग्रेस आणि भाजपात फरक असल्याची टीका त्यांनी केली.

शेतकऱ्यांचे संरक्षण आणि युवकांना रोजगार देण्याचे काम फक्त काँग्रेसच देऊ शकतो, अशी ग्वाही त्यांनी दिली. यावेळी त्यांनी काँग्रेस कार्यकर्त्यांना प्रोत्साहन देत त्यांच्यामुळेच आज पक्षाची प्रगती झाल्याचे म्हटले. कार्यकर्ताच पक्षाला निवडणुका जिंकून देतो. प्रत्येक कार्यकर्त्याचे रक्षण पक्षाकडून केले जाईल, असा विश्वास देत राजस्थानमध्ये कार्यकर्त्यांसाठी शक्ती प्रकल्प तयार केल्याचे सांगितले. काँग्रेस हा पक्ष नेत्यांचा नसून कार्यकर्त्यांचा असल्याचे ते म्हणाले. ही विचारधारेची लढाई आहे.

देशात २ कोटी रोजगार निर्मित करणार असल्याचे आश्वासन मोदींनी दिले होते. भारतात सध्या २४ तासांत ४५० जणांना रोजगार मिळतो. तर चीनमध्ये ५० हजार जणांना रोजगार मिळतो. नोटाबंदी आणि जीएसटीमुळे देशातील व्यापाऱ्यांचे मोठे नुकसान झाले असल्याची टीकाही त्यांनी केली. एकीकडे व्यापाऱ्यांचे मोठे नुकसान होत असताना अमित शाह यांचा मुलगा जय शाह याच्या संपत्तीत इतकी वाढ कशी होते, असा सवालही त्यांनी उपस्थित केला.