मुजम्मिलसह तिघांना जन्मठेप

मुलुंड, मुंबई सेंट्रल आणि विलेपार्ले बॉम्बस्फोट प्रकरण
डिसेंबर २००२ ते मार्च २००३ या दरम्यान मुंबई सेंट्रल स्थानकावरील मॅक्डोनाल्डमध्ये, विलेपार्ले येथील बाजारपेठेत आणि मुलुंड स्थानकात उपनगरी गाडीत बॉम्बस्फोट घडविणाऱ्या मुजम्मिल अन्सारी याच्यासह तिघांना ‘पोटा’ न्यायालयाचे न्या. पी. आर. देशमुख यांनी बुधवारी जन्मठेप सुनावली. मुजम्मिल यानेच या तिन्ही ठिकाणी बॉम्ब ठेवले होते त्यामुळे त्याला आजन्म जन्मठेप ठोठावण्यात आली आहे. ‘सिमी’ या बंदी घातलेल्या संघटनेचा माजी सचिव साकीब नाचन याला न्यायालयाने दहा वर्षांचा तुरुंगवास ठोठावला. ‘पोटा’अंतर्गत दाखल असलेला हा शेवटचा खटला होता. फरहान खोत आणि डॉ. वाहिद अन्सारी या दोघांचा जन्मठेप झालेल्या दोषींमध्ये समावेश आहे. या प्रकरणातील आणखी दोन आरोपींना दोन वर्षांचा तुरुंगवास ठोठावण्यात आला आहे. या खटल्यात एकूण दहा आरोपी होते.
अन्सारीविरोधातील आरोप हे ‘दुर्मीळातील दुर्मीळ’ प्रकारात मोडत नाहीत. तसेच फासावर लटकवताच काही क्षणांत जीवन संपत असल्याने त्याच्या दुष्कृत्यापायी कित्येक निरपराधांना कोणत्या मानसिक व भावनिक यातना भोगाव्या लागत आहेत, याची जाणीव दोषीला होत नाही. त्यामुळे आजन्म जन्मठेप या प्रकरणात योग्य असल्याचे न्यायालयाने स्पष्ट केले. न्यायालयाने सगळ्या आरोपींना मिळून ९.४५ लाख रुपयांचा दंड ठोठावला. त्यातील ७५ टक्के जिल्हा विधी सेवा प्राधिकरणाला, तर उर्वरित रक्कम रेल्वेला नुकसान भरपाई म्हणून देण्याचे आदेशही दिले आहेत.
या बॉम्बस्फोटांमध्ये मृत्युमुखी पडलेल्यांच्या कुटुंबांबाबत तसेच जखमींबाबत पुरेसा पुरावा समोर आलेला नाही. त्यामुळे त्यांना नुकसान भरपाई देण्यात अडचण असल्याचेही न्यायालयाने स्पष्ट केले.
सुटकाही लगेच..
महम्मद कामील जमील शेख, नूर महम्मद, अन्वर अली या तिघांना अवैध हत्यारे बाळगल्याप्रकरणी दोन वर्षांचा कारावास आणि दोन हजार रुपये दंड ठोठावला आहे. या तिघांनीही आठ वर्षे तुरुंगात काढली आहेत शिवाय साकीब नाचन यानेही बराच काळ तुरुंगात काढल्याने या सर्वाची सुटका होणार आहे.