मुंबईः शेअर बाजारमधील गुंतवणुकीतून चांगला नफा मिळवून देण्याचे आमिष दाखवून मुलुंड (पूर्व) येथील एका ५७ वर्षीय चार्टर्ड अकाउंटंटची (सीए) ९७ लाख २४ हजार रुपयांची सायबर फसवणूक करण्यात आल्याचा प्रकार उघडकीस आला आहे. आरोपीने आर गारा नावाच्या बनावट ट्रेडिंग ॲप्लिकेशनद्वारे ही फसवणूक केली. त्याची जाहिरात व्हॉट्सअॅपवरून करण्यात आल्याचे तक्रारीत म्हटले आहे.
याप्रकरणी सायबर पोलिसांनी गुन्हा दाखल केला असून बँक व्यवहारांच्या माध्यातून पोलीस तपास करीत आहेत.तक्रारदार सीए कुटुंबासह गेली ३० वर्ष मुलुंड पूर्व येथे राहतात. तक्रारदार आणि त्यांच्या मुलाच्या नावावर राष्ट्रीयकृत बँकेच्या हरिओम नगर शाखेत बचत खाते आहे. ते खाते तक्रारदार व त्यांच्या मुलाच्या मोबाइल क्रमांकाशी जोडलेले आहेत. ४ ऑक्टोबर २०२४ रोजी, व्हॉट्स अॅप पाहत असताना “प्रॅक्टिस प्रुव्हज ट्रुथ, आर गारा” नावाच्या ग्रुपमध्ये अॅप लिंक आली होती. शेअर मार्केटबाबत इच्छुक असल्याचे तक्रारदाराने त्या लिंकवर क्लिक केले असता ते ग्रुपमध्ये सामील झाले. या ग्रुपमध्ये आणखी ८० ते ८५ सदस्य सहभागी होते. त्या ग्रुपवर शेअर बाजारशी संबंधित सल्ले व चर्चा नियमित होत होती.
व्हीआयपी व्हॉट्स ग्रुपचे अॅडमिन अर्जुन हिंदुजा, इशानी मेहता, स्नेहा बन्सल होते. ते स्वतःला “एच१८ कस्टमर सर्व्हिस सेंटर”चे प्रतिनिधी असल्याचे भासवत होते. अर्जुन हिंदुजा याने स्वतःची ट्रेडिंग शिकवणारा प्रशिक्षक म्हणून ओळख करून दिली, तर इशानी मेहता यांनी शेअर्स विक्री व खरेदीचे मार्गदर्शन करायची. तक्रारदाराने शेअर खरेदी-विक्रीत रस असल्यामुळे त्यांना व्हीआयपी ग्रुपमध्ये सामील करण्यात आले. तेथे गुंतवणुकीसंबंधी सल्ले दिले जात होते.
बनावट मोबाइल ॲप
इशानी मेहताच्या सूचनेवरून तक्रारदाराने “आर गारा” हे अॅप डाऊनलोड करून, मोबाइल क्रमांकाने नोंदणी केली. त्यानंतर ग्रुपच्या तथाकथित ग्राहक मदत क्रमांकावरून विविध बँक खात्यांमध्ये पैसे हस्तांतरित करण्यास सांगण्यात आले. अॅपमध्ये बनावट नियमित नफ्याचे आकडे दिसत होते. त्यामुळे तक्रारादाराला विश्वास बसला. त्यांनी ४ ते २९ ऑक्टोबर, २०२४ या कालावधीत ९७ लाख २४ हजार ५०० रुपयांची गुंतवणूक केली. त्यांना नियमित पैसे वाढत असल्याचे दिसत होते.
आयपीओ गुंतवणूकीचे आमीष
आरोपींनी आयपीओमध्ये गुंतवणूक केल्यास मोठ्या फायद्याचे आमिष दाखवले. तेव्हा तक्रारदाराने त्यास नकार दिला. त्यावेळी आरोपींनी आयपीओमध्ये गुंतवणूक न केल्यास पूर्वीची रक्कम परत मिळणार नाही, असे सांगितले. त्यावेळी तक्रारदाराला संशय आला. पडताळणी केली असता त्यांनी डाऊनलोड केलेले मोबाइल ॲप्लिकेशनमध्ये खोटा नफा दाखवला जात असल्याचे निष्पन्न झाले. याप्रकरणी नुकताच पूर्व प्रादेशिक सायबर पोलिसांनी गुन्हा दाखल केला आहे. तक्रारीनुसार, आरोपींनी खोटे नफे दाखवून, बनावट खाते वापरून आणि मोठ्या परताव्याचे आमिष दाखवून तक्रारदाराचा विश्वास संपादन केला आणि कट रचून आरोपींनी तक्रारदार सीएची ९७ लाख २४ हजार रुपयांची सायबर फसवणूक केली. पोलीस या प्रकरणाचा तपास करीत आहेत.
