विधि अभ्यासक्रमाच्या पहिल्या फेरीतील प्रवेश ११ ऑगस्टपासून

विधि तीन वर्ष अभ्यासक्रमाच्या प्रवेशासाठी सीईटी कक्षाने २ ऑगस्ट रोजी गुणवत्ता यादी जाहीर केली. त्यानंतर ३ ते ५ ऑगस्ट या कालावधीत विद्यार्थ्यांना पसंतीक्रम भरण्यासाठी मुदत देण्यात आली होती. गुणवत्ता यादीत निवड झालेल्या ४४ हजार ५८३ विद्यार्थ्यांपैकी ४० हजार ३२३ विद्यार्थ्यांनी महाविद्यालयांचा पसंतीक्रम भरला होता.

सीईटी कक्षाने पसंतीक्रम भरलेल्या विद्यार्थ्यांची शुक्रवारी रात्री उशीरा निवड यादी जाहीर केली. यामध्ये १४ हजार ९८८ विद्यार्थ्यांना प्रवेशाची संधी मिळाली. यापैकी ७ हजार ५७० विद्यार्थ्यांना पहिल्या पसंतीचे महाविद्यालय मिळाले.

तसेच ७ हजार ४१८ विद्यार्थ्यांना अन्य पसंतीक्रमाचे महाविद्यालय मिळाले. निवड यादी ८ ऑगस्ट रोजी जाहीर करण्यात आली असली तरी त्यानंतर रक्षाबंधन व रविवार अशा दोन सलग सुट्या आल्याने विधि तीन वर्ष अभ्यासक्रमाच्या प्रवेशासाठी ११ ऑगस्टपासून सुरुवात करण्यात येणार आहे. त्यामुळे निवड झालेल्या विद्यार्थ्यांना ११ ते १३ ऑगस्ट या कालावधीत प्रत्यक्ष महाविद्यालयात जाऊन प्रवेश घ्यायचा आहे. त्यानंतर १४ ऑगस्ट रोजी रिक्त जागांचा तपशील संकेतस्थळावर जाहीर करण्यात येणार असल्याचे सीईटी कक्षाकडून सांगण्यात आले.