जून महिन्यात सरासरी १५.२ मिमी पाऊस

यंदा हवामान विभागाने सरासरी ९६ टक्के पावसाची शक्यता वर्तवली होती. नैऋत्य मोसमी वारे ८ जून रोजी केरळमध्ये दाखल झाले होते. तळकोकणात ११ जून रोजी दाखल झाले. यानंतर पुढील दोन दिवसांत राज्याच्या उर्वरीत भागात आगेकूच करतील, असा अंदाज हवामान खात्याने व्यक्त केला होता. मात्र, जूनचा अर्धा महिना होऊनही मोसमी पावसाने अद्याप हजेरी लावलेली नाही. दरम्यान, मोसमी वारे २३ जूनपर्यंत राज्यात सक्रीय होतील असा अंदाज वर्तवण्यात आला होता. मात्र, राज्यातील मोसमी पावसाचा प्रवास थंडावला असून अद्यापही पावसाने पुढील टप्पा गाठलेला नाही. त्यामुळे २३ जूनपर्यंत मुंबईसह राज्याच्या इतर भागांत मोसमी पावसाच्या हजेरीचा अंदाज चुकण्याची शक्यता आहे.

पावसाच्या महत्त्वाच्या महिन्यांमध्ये जून आणि जुलै महिना गणला जातो. जून आणि जुलै हे मुसळधार पावसाचे महिने म्हणून ओळखले जातात. मोसमी पाऊस दाखल झाला की जून आणि जुलैमध्ये राज्यभर पाऊस दमदार हजेरी लावतो. त्यानंतर ऑगस्ट, सप्टेंबर हलक्या सरी, ऊन-पावसाचा खेळ सुरू होतो. यंदाचे वर्ष मात्र यासाठी अपवाद ठरणार असल्याचे दिसत आहे. राज्यात १ ते ३० जून या कालावधीत सरासरी २०७.६ मिमी पावसाची नोंद होते. यंदा आतापर्यंत सरासरी १५.२ मिमी पावसाची नोंद झाली आहे. मध्य महाराष्ट्रात यंदा १३.७ मिमी पावसाची नोंद झाली आहे. सोलापूरमध्ये पाऊस न पडल्याची नोंद केली गेली आहे.