‘मेट्रो-३’ प्रकल्प नियोजित वेळेत पूर्ण होणार

भाजपचा निर्धार; ठरलेल्या वेळापत्रकानुसार काम सुरू राहण्याचा विश्वास
‘मेट्रो-३’ हा भाजपचा महत्त्वाकांक्षी प्रकल्प असून कोणत्याही परिस्थितीत त्याचे काम नियोजित वेळेतच सुरू करण्याचा निर्धार भाजपने केला आहे. शिवसेनेने काँग्रेसला हाताशी धरून ‘मेट्रो-३’साठी जागा देण्याबाबतचा फेटाळलेला प्रस्ताव पुन्हा पालिका सभागृहात फेरविचारार्थ सादर करण्याची मागणी भाजपकडून करण्यात येणार आहे. मात्र त्यासाठी तीन महिने भाजपला वाट पाहावी लागणार आहे; परंतु तोपर्यंत ‘मेट्रो-३’ प्रकल्पाच्या कामाच्या नियोजित वेळापत्रकात कोणताही अडथळा निर्माण होणार नाही, असे भाजपकडून स्पष्ट करण्यात आले.
‘मेट्रो-३’ प्रकल्पासाठी पालिकेकडून १७ भूखंड देण्यात येणार असून त्याबाबतचा प्रस्ताव सुधार समितीमध्ये सादर केला होता. हा प्रस्ताव सुधार समिती अध्यक्ष प्रकाश गंगाधरे यांनी काँग्रेस सदस्यांना हाताशी धरून मंजूर करून घेतला होता. त्यावेळी शिवसेनेने या प्रकल्पाला विरोध केला होता. हा प्रस्ताव पालिका सभागृहात सादर होताच शिवसेनेने भाजपचीच खेळी खेळत काँग्रेसच्या खांद्यावर बंदूक ठेऊन हा प्रस्ताव दफ्तरी दाखल केला. त्यामुळे शिवसेना आणि भाजपमधील वाद विकोपाला जाण्याची चिन्हे आहेत.
दफ्तरी दाखल केलेला हा प्रस्ताव पालिका सभागृहात फेरविचारार्थ सादर करता येतो. मात्र प्रस्ताव मंजूर झाल्यानंतर तीन महिन्यांनी मागणी केल्यानंतर तो सभागृहात सादर केला जातो. भाजपने मागणी करीत हा प्रस्ताव फेरविचारार्थ सभागृहात सादर करण्याचा निर्णय घेतला आहे. त्यासाठी तीन महिने भाजपला वाट पाहावी लागणार आहे. मात्र उपसूचनेनुसार प्रस्ताव दफ्तरी दाखल करण्याचा ठराव रद्दबातल करण्याचे अधिकार राज्य सरकारला आहेत. त्यामुळे ‘मेट्रो-३’च्या कामात कोणताही अडथळा येणार नाही, असे भाजपच्या नेत्यांकडून सांगण्यात आले. या प्रकरणावरून गुरुवारी पालिका सभागृहात शिवसेना, भाजप आणि काँग्रेसकडून एकमेकांवर आरोप-प्रत्यारोपांच्या फैरी झाडण्यात आल्या.