नगरसेवकालाच माहिती देण्यास आयुक्तांच्या सचिवाची ‘टाळाटाळ’

गहाळ झालेल्या फाईल्सच्या पाश्र्वभूमीवर मागितलेली माहिती ‘माहितीच्या अधिकारा’अंतर्गत अर्ज करुन मिळवावी, असे लेखी उत्तर पालिका आयुक्तांच्या सचिवाने भाजप नगरसेवकाला दिल्यामुळे पालिका सभागृह अवाक्  झाले. पालिकेविषयी सदस्याने मागितलेली माहिती त्याला तात्काळ द्यावी, असे स्पष्ट करीत महापौरांनी या प्रकरणाच्या चौकशीचे आदेश दिले.
महापालिकेच्या विकास नियोजन आणि इमारत प्रस्ताव विभागातील गहाळ झालेल्या फाईल्सचे प्रकरण सध्या गाजत आहे. या पाश्र्वभूमीवर विकास नियोजन विभागाचे प्रमुख अभियंता राजीव कुकनूर आणि पालिका आयुक्त कार्यालयांतील कार्यकारी अभियंता रा. भा. झोपे यांनी गेल्या दीड वर्षांमध्ये किती फाईल मंजूर केल्या याची माहिती भाजप नगरसेवक अमित साटम यांनी आयुक्त सीताराम कुंटे यांना पत्र पाठवून केली होती. तसेच या संदर्भात माहिती देण्यासाठी त्यांना एसएमएसही पाठविला होता. आयुक्तांकडून त्यांना मिळालेल्या उत्तरामध्ये याबाबत माहितीच्या अधिकाराअंतर्गत अर्ज करुन माहिती मिळवावी, असे स्पष्ट म्हटले होते. हा प्रश्न साटम यांनी सभागृहात उपस्थित केला. सुबोध कुमार यांनी हकालपट्टी केलेल्या कुकनूर यांना कुंटे यांनी परत आणले. मागील तारीख टाकून भोगवटा प्रमाणपत्र देणाऱ्या दोन अधिकाऱ्यांनाही कुंटे यांनी पुन्हा वरिष्ठ पदावर स्थानापन्न केल्याचा आरोपही त्यांनी यावेळी केला. आयुक्तांच्या या करामती मुख्यमंत्री पृथ्वीराज चव्हाण यांच्या कानावर घालण्याची वेळ आली आहे, असेही ते म्हणाले. भाजप गटनेते दिलीप पटेल, शिक्षण समिती अध्यक्ष मनोज कोटक आणि शिवसेने नगरसेवक सुरेंद्र बागलकर यांनीही आयुक्तांच्या या कृत्याबाबत तीव्र आक्षेप घेतला. पालिकेशी संबंधित प्रत्येक विषयाची माहिती नगरसेवकांना देणे आयुक्त आणि प्रशासनाला बंधनकारक आहे. केवळ गोपनीय बाबी प्रशासनाला उघड करता येत नाही. परंतु अन्य माहिती नगरसेवकांना देण्यास हरकत नाही. त्यामुळे कोणत्याही नगरसेवकाने माहिती मागितल्यास ती तात्काळ देण्यात यावी, असे आदेश प्रभू यांनी दिले. आयुक्तांना पत्र लिहून माहिती मागविली होती. मग आयुक्तांच्या सचिनाच्या स्वाक्षरीचे उत्तर साटम यांना कसे मिळाले, असा प्रश्न उपस्थित करुन महापौरांनी या प्रकरणी चौकशीचे आदेश दिले.
  विकास नियोजन विभागाचे प्रमुख अभियंता राजीव कुकनूर आणि पालिका आयुक्त कार्यालयांतील कार्यकारी अभियंता रा. भा. झोपे यांनी गेल्या दीड वर्षांमध्ये किती फाईल मंजूर केल्या याची माहिती भाजप नगरसेवक अमित साटम यांनी आयुक्त सीताराम कुंटे यांना पत्र पाठवून केली होती.