मुंबई : भर रस्त्यात पत्नीने मोठमोठय़ाने नपुंसक म्हणून हिणवल्याने लाज वाटणे स्वाभाविक आहे, असे निरीक्षण नोंदवत उच्च न्यायालयाने पत्नीचा खून करणाऱ्याची जन्मठेपेची शिक्षा कमी करून ती १२ वर्षे केली. अचानक प्रवृत्त केल्याने आरोपीकडून गुन्हा घडल्याचे न्यायालयाने त्याची शिक्षा कमी करताना नमूद केले. आरोपीला कनिष्ठ न्यायालयाने पत्नीच्या खुनाप्रकरणी दोषी ठरवून जन्मठेपेची शिक्षा सुनावली होती. त्याविरोधात त्याने उच्च न्यायालयात धाव घेतली होती. न्यायमूर्ती साधना जाधव आणि न्यायमूर्ती पृथ्वीराज चव्हाण यांच्या खंडपीठाने आरोपीने कोणत्या स्थितीत गुन्हा केला हे त्याची जन्मठेप रद्द करून त्याला १२ वर्षांच्या कारावासाची शिक्षा सुनावताना प्रामुख्याने लक्षात घेतले. घटनेच्या दिवशी अचानक आरोपीला योगायोगाने पाहिल्यानंतर त्याच्या पत्नीने केवळ त्याची शर्टची कॉलर पकडून त्याला अडवलेच नाही, तर त्याला शिवीगाळ केली. तसेच भर रस्त्यात मोठमोठय़ाने त्याला नपुंसक म्हणून हिणवले याकडे न्यायालयाने लक्ष वेधले.