मुंबईची तुंबई झाली तर अकार्यक्षम अधिकाऱ्यांवर कठोर कारवाई; मुख्यमंत्र्यांची तंबी

यावेळी एकनाथ शिंदे म्हणाले, दरवर्षी पावसाळ्यात मुंबईकरांना नाहक त्रास सहन करावा लागतो. यावर्षी त्यांना हा त्रास करावा लागू नये, म्हणून नाले सफाई चांगली झाली पाहिजे. नाल्यांचे खोलीकरण मोठ्या प्रमाणावर करा, असे निर्देश महापालिका प्रशासनाला दिले आहेत. किती मेट्रिक गाळ काढला यापेक्षा नाल्यांचे खोलीकरण कठीण खडक लागेपर्यंत करा. अशा सूचना दिल्या आहेत. जे अधिकारी चांगले काम करतील त्यांचा सन्मान केला जाईल. पण जे अधिकारी कर्तव्य पार पाडणार नाहीत. त्यांच्यावर कठोर कारवाई केली जाईल, असा इशाराही मुख्यमंत्र्यांनी दिला.

नाल्यांचे खोलीकरण झाल्यावर त्यांची वहन क्षमता वाढेल. त्याचबरोबर ज्याठिकाणी दरवर्षी पाणी साचते, त्यांची माहिती अधिकाऱ्यांना असते. त्यामुळे अशाजागी नोडल अधिकारी नेमून कंत्राटदाराकडून चांगल्या पद्धतीने काम करुन घेण्याच्या सूचना मुख्यमंत्र्यांनी दिल्या. वरळी येथील लव्हग्रोव्ह उदंचन केंद्राच्या ठिकाणी नाल्यांना फ्लड गेट लावण्यात आले आहेत. जेणेकरून भरतीच्यावेळी समुद्रातील पाणी नाल्यांमध्ये शिरणार नाही.

त्याचबरोबर फ्लड गेट आणि वेगाने पावसाचे पाणी समुद्रात फेकणाऱ्या पंपाची संख्या वाढवावी, असे निर्देशही मुख्यमंत्र्यांनी दिले. रेल्वे हद्दीतील नाल्यांची देखील चांगल्या पद्धतीने सफाई झाली पाहिजे, जेणे करून रेल्वेरुळांवर पाणी साचणार नाही, याची दक्षता घेण्याचे निर्देशही मुख्यमंत्र्यांनी महापालिका प्रशासनाला दिले.