मुंबई : राज्य शासनाच्या औषध प्रशासन विभागातर्फे कफ सिरफ तयार करणाऱ्या ८४ कंपन्यांची तपासणी करण्यात आली असून २७ दोषी कंपन्यांना कारणे दाखवा नोटीस बजावण्यात आली असून चार कंपन्यांचे उत्पादन बंद तर सहा कंपन्यांचे परवाने रद्द करण्यात आल्याची माहिती औषध प्रशान मंत्री संजय राठोड यांनी दिली.
देशातून निर्यात झालेल्या सदोष कफ सिरपमधील हानीकारक घटकद्रव्यांमुळे ६६ मुलांचा मृत्यू झाल्याची शक्यता जागतिक आरोग्य संघटनेने निदर्शनास आणून दिली. त्यानंतर राज्यात तयार होणाऱ्या विविध प्रकारच्या औषधांच्या गुणवत्ता तपासण्या (स्टॅबिलिटी स्टेट) झाल्यानंतरच जागतिक बाजारपेठेत पाठवणे बंधनकारक असताना राज्यातील २०० औषध उत्पादकांकडून तयार करण्यात येणारी २००० पेक्षा अधिक औषधे कोणत्याही प्रकारचे स्थिरता चाचणी प्रमाणपत्र न घेताच निर्यात होत असल्याचे फेब्रुवारी, २०२३ मध्ये आढळून आले. त्यामुळे राज्यातील या २०० औषध उत्पादकांची सखोल चौकशी करून त्यांचे परवाने रद्द करून कारवाई करण्याची मागणी करीत भाजप आमदार आशीष शेलार यांनी लक्षवेधी सूचना उपस्थित केली होती.
ही घटना गंभीर असून याप्रकरणी सदर कंपनीवर सदोष मनुष्यवधाचा गुन्हा दाखल करा अशी मागणी आमदार आशीष शेलार यांनी केली. याबाबत उत्तर देताना मंत्री संजय राठोड यांनी सांगितले की, जागतिक आरोग्य संघटना यांनी गांबियामधील ६६ मुलांच्या मृत्यूवरून ऑक्टोबर २०२२ मध्ये अलर्ट जारी केला होता. त्याअनुषंगे अन्न व औषध प्रशासनाच्या परिपत्रकानुसार महाराष्ट्र राज्यातील द्रवरूप व तोंडाद्वारे घेतल्या जाणाऱ्या सिरपचे उत्पादन करणाऱ्या उत्पादकांची, अन्न व औषध प्रशासनाने जागतिक आरोग्य संघटना यांनी गांबियामधील मुलांच्या मृत्यूवरून जारी केलेल्या बातमीच्या अनुषंगाने तपासणी मोहीम हाती घेतली होती. यामध्ये ८४ कंपन्यांची तपासणी करण्यात आली. ज्या उत्पादकाकडे स्थिरता चाचणीमध्ये त्रुटी आढळून आले आहेत अशा एकूण २७ कंपन्या आढळून आल्या आहेत. त्यांच्याविरुद्ध आवश्यक कारवाई करण्यात येत आहे.
राज्यात एकूण ९९६ ऑलोपॅथिक उत्पादक असून त्यापैकी ५१४ उत्पादक निर्यात करतात. तसेच गेल्या वर्षभरात ८२५९ किरकोळ विक्रेत्यांचीही तपासणी करण्यात आली असून दोन हजार परवाना धारकांना कारणे दाखवा तर ४२४ परवाने रद्द व ५६ जणांवर गुन्हा दाखल करण्यात आल्याचे मंत्र्यांनी. सांगितले होते.
नोएडातील औषध कंपनीच्या तीन कर्मचाऱ्यांना अटक
नवी दिल्ली : गेल्या वर्षी उझबेकिस्तानमध्ये खोकल्याचे औषध प्राशन केल्याने १८ मुले दगावली होती. हे औषध नोएडास्थित औषधनिर्माण कंपनीचे असल्याचे तपासात सिद्ध झाल्यानंतर पोलिसांनी शुक्रवारी या कंपनीतील तीन कर्मचाऱ्यांना अटक केली. सेंट्रल ड्रग्ज स्टँडर्ड कंट्रोल ऑर्गनायझेशनच्या तक्रारीवरून ‘मॅरियन बायोटेक’ या औषधनिर्माण कंपनीच्या दोन संचालकांसह पाच अधिकाऱ्यांविरोधात गुरुवारी रात्री उशिरा एफआयआर दाखल केल्यानंतर अटक करण्यात आली आहे, असे पोलिसांनी सांगितले.
