शिक्षण मंडळाच्या आदेशावरूनच विद्यार्थ्यांकडून शुल्क वसुली

– सोमय्या महाविद्यालयाचे स्पष्टीकरण
– मंडळाने मात्र जबाबदारी महाविद्यालयावर ढकलली
बारावी परीक्षेच्या ओळखपत्रावरील चुकांची दुरूस्ती करण्यासाठी ‘राज्य शिक्षण मंडळा’च्या आदेशावरूनच विद्यार्थ्यांकडून शुल्क घेण्यात आल्याचा खुलासा विद्याविहार येथील ‘के. जे. सोमय्या विज्ञान आणि वाणिज्य महाविद्यालया’ने केला असला तरी हे शुल्क महाविद्यालयांनी विद्यार्थ्यांकडून घेण्याऐवजी स्वत:च भरणे अपेक्षित आहे, असे मुंबई विभागीय शिक्षण मंडळाने स्पष्ट केले आहे. त्यामुळे शिक्षण मंडळ आणि महविद्यालय एकमेकांवर जबाबदारी ढकलत असल्याचे चित्र समोर आले आहे.
बारावीच्या ओळखपत्रातील दुरुस्तीकरिता सोमय्या महाविद्यालयात १७ विद्यार्थ्यांकडून मनमानीपणे पैसे उकळण्यात आल्याबाबतचे वृत्त शनिवारी प्रसिद्ध झाले. त्यावर खुलासा करताना सोमैय्या महाविद्यालयाचे प्राचार्य विजय जोशी यांनी हे पैसे मंडळाच्या आदेशावरून विद्यार्थ्यांकडून घेतल्याचे म्हटले आहे. तसेच, या १७ विद्यार्थ्यांचे मिळून आठ हजार ६०० रुपये इतकी रक्कम मंडळाकडे जमा केल्याचेही त्यांनी स्पष्ट केले आहे. मात्र, ही रक्कम ओळखपत्रातील दुरुस्तीसाठी म्हणून महाविद्यालयानेच दंडापोटी भरणे अपेक्षित आहे, असा खुलासा मुंबई विभागीय मंडळाचे अध्यक्ष लक्ष्मीकांत पांडे यांनी म्हटले आहे. ‘हे पैसे कुणी भरावे, याबाबत मंडळाच्या परिपत्रकात स्पष्ट उल्लेख नाही. पण, ही रक्कम प्री-लिस्ट पाठविण्यास विलंब करणाऱ्या महाविद्यालयांना दंडापोटी आकारली जाते. त्यामुळे, ते महाविद्यालयांनीच भरायला हवे,’ असे त्यांचे म्हणणे आहे.