महावीर जयंतीनिमित्त नक्की सुट्टी कधी, असा प्रश्न शासकीय कर्मचाऱ्यांना पडला होता. कारण न्यायालये व काही शासकीय कार्यालयांना आज, मंगळवारी सुट्टी असून, मंत्रालय आणि बँकांना बुधवारी सुट्टी आहे. महावीर जयंतीनिमित्त सर्व न्यायालयांना मंगळवारी सुट्टी देण्यात आली आहे. विधान भवनातील कर्मचाऱ्यांना आजच सुट्टी आहे. विधान भवनापासून हाकेच्या अंतरावर असलेल्या मंत्रालयाला मात्र बुधवारी सुट्टी आहे. बँकाही बुधवारी बंद राहणार आहेत. मंत्रालयाला बुधवारी सुट्टी असल्याने विधान भवनातील कर्मचाऱ्यांमध्ये दिवसभर गोंधळाचे वातावरण होते. नक्की सुट्टी कधी याबाबत सामान्य प्रशासन विभागाकडे विचारणा करण्यात येत होती. शासकीय सुट्टय़ांच्या यादीत महावीर जयंतीची सुट्टी २४ तारखेला असल्याने वेगळा आदेश काढण्याची आवश्यकता नाही, असे सामान्य प्रशासन विभागाने स्पष्ट केले.