हेमा उपाध्याय हत्याप्रकरणात वाराणसीतून एकाला अटक

चित्रकार, छायाचित्रकार आणि मांडण शिल्पकार म्हणून जगविख्यात असलेल्या हेमा उपाध्याय (४२) आणि त्यांचे वकील हरीश भांबानी (६५) यांच्या हत्येप्रकरणी सोमवारी उत्तर प्रदेशातील वाराणसी येथून शिवकुमार उर्फ साधू राजभर या व्यक्तीला अटक करण्यात आली. या हत्याप्रकरणातील मारेकरी उत्तर प्रदेशात लपून बसल्याचा पोलिसांना संशय होता. त्यामुळे मुंबई पोलिसांचे एक पथक उत्तर प्रदेशला पाठविण्यात आले होते. या पथकाने सोमवारी कारवाई करत वाराणसीतून शिवकुमार उर्फ साधू राजभर याला ताब्यात घेतले.
हेमा उपाध्याय आणि वकील हरीश भांबानी यांचे मृतदेह रविवारी कांदिवली येथील एका नाल्यात आढळले होते. दरम्यान, या प्रकरणात हेमा यांच्या पतीसह तिघांची चौकशी करण्यात आली होती. कांदिवली परिसरातील डहाणूकरवाडी स्मशानभूमीजवळ उपाध्याय आणि भांबानी यांचे मृतदेह आढळून आले. नाल्यामध्ये कचरा गोळा करण्यासाठी आलेल्या एका कामगाराला रविवारी नाल्यात दोन वेगवेगळी खोकी दिसली. या घटनेची माहिती पोलिसांना कळविल्यानंतर पोलीस घटनास्थळी दाखल झाले. या खोक्यांमध्ये हे मृतदेह आढळून आले. या दोघांचीही हत्या गळा दाबून करण्यात आली असावी, असा प्राथमिक अंदाज पोलिसांकडून व्यक्त करण्यात आला आहे. दोघांची शनिवारी हत्या करून त्यांचे मृतदेह खोक्यांमध्ये ठेवण्यात आले असावेत, अशी शक्यता आहे. दोन्ही मृतदेह शवविच्छेदनासाठी पाठविण्यात आले आहेत, असे पोलीस उपायुक्त धनंजय कुलकर्णी यांनी सांगितले. शुक्रवारी रात्री उशिरापर्यंतही हेमा उपाध्याय घरी न पोहोचल्याने त्यांचे मदतनीस हेमंत मंडल यांनी तर मृत हरीश भांबानी हेही घरी न परतल्याने त्यांच्या कुटुंबीयांनी शुक्रवारीच पोलिसांकडे तक्रार दाखल केली होती.