मुंबई : पूर्व उपनगरातील भांडुप येथील सुषमा स्वराज प्रसूतिगृहामध्ये टॉर्चच्या साहाय्याने प्रसूती केल्याची घटना उघडकीस आली असून सिझेरियनद्वारे प्रसूती करण्यात आलेल्या नवजात अर्भकाचा आणि महिलेचा उपचारादरम्यान मृत्यू झाला. या घटनेनंतर महिलेच्या कुटुंबियांनी संताप व्यक्त केला असून, याप्रकरणाची दखल घेत मुंबई महानगरपालिकेच्या आरोग्य विभागाने चौकशी समिती स्थापन केली आहे. हेही वाचा : लोकलमधून पडून तीन महिन्यांत १३९ बळी ; रखडलेले प्रकल्प, मर्यादित फेऱ्यांमुळे जीवघेण्या प्रवासाची वेळ भांडुप येथील महानगरपालिकेच्या सुषमा स्वराज प्रसूतिगृहात सोमवारी एका मुस्लिम महिलेला प्रसूतीसाठी दाखल करण्यात आले होते. प्रसूतीदरम्यान अचानक विद्युत प्रवाह खंडीत झाल्याने शस्त्रक्रियागृहात अंधार पसरला. प्रसंगाचे गांभीर्य लक्षात घेत डॉक्टरांनी टॉर्चच्या प्रकाशझोतामध्ये महिलेची सिझेरियन पद्धतीने प्रसूती केली. मात्र नवजात अर्भकाचा मृत्यू झाला, तर प्रसूतिदरम्यान मोठ्या प्रमाणात रक्तस्राव झाल्याने महिलेची प्रकृती चिंताजनक झाली. त्यामुळे तिला तातडीने शीव रुग्णालयात हलविण्यात आले. मात्र, शीव रुग्णालयात उपचारादरम्यान महिलेचाही मृत्यू झाला. या घटनेनंतर कुटुंबिय संतप्त झाले. या घटनेचा स्थानिक माजी नगरसेविकेने निषेध करीत मुंबई महानगरपालिकेच्या कारभाराविरोधात संताप व्यक्त केला. या घटनेची दखल घेत मुंबई महानगरपालिकेच्या आरोग्य विभागाने चौकशी समिती स्थापन केली.
