मुंबई : भाजप नेते किरीट सोमय्या यांचे पुत्र नील सोमय्यांनी शुक्रवारी सत्र न्यायालयात अटकपूर्व जामीनासाठी धाव घेतली. मात्र संबंधित न्यायालयाचे न्यायाधीश शुक्रवारी उपलब्ध न झाल्याने नील यांच्या अर्जावर सुनावणी होऊ शकली नाही. त्यांच्या अर्जावर आता सोमवारी सुनावणी होण्याची शक्यता आहे. पंजाब आणि महाराष्ट्र (पीएमसी) बँक घोटाळय़ातील आरोपी राजेश वाधवान याचे नील सोमय्या यांच्याशी संबंध असल्याचा आरोप शिवसेना खासदार संजय राऊत यांनी काही दिवसांपूर्वी पत्रकार परिषदेत केला होता. पीएमसी बँक घोटळय़ाचे पैसे निकॉन इन्फ्रास्ट्रक्चर नावाच्या कंपनीत गुंतवल्याचा आरोप करताना या प्रकरणी सोमय्या बाप-बेटे तुरुंगात जातील, असे विधानही राऊतांनी केले होते. निकॉन इन्फ्रास्ट्रक्चर कंपनी सोमय्या यांच्या मालकीची कंपनी आहे. या प्रकरणी गुन्हा दाखल झालेला नसला तरी नील यांना अटकेची भीती आहे.