‘एक संधी नव्या नेतृत्वाला’, माजी महापौरांच्या प्रभागातील फलकबाजीमुळे उद्धव ठाकरेंसमोर नवे आव्हान

मुंबई महानगरपालिकेच्या आगामी निवडणुकीसाठी प्रभाग आरक्षणाची सोडत मंगळवारी पार पडली. अनेक माजी नगरसेवकांचे प्रभाग आरक्षित झाल्याने तो आसपासच्या प्रभागांमधून उमेदवारी मिळविण्यासाठी चाचपणी करीत आहेत. त्यामुळे त्या प्रभागांतील इच्छुक नाराज झाले आहेत. तर काही माजी नगरसेवकांसमोर पक्षातील अन्य इच्छुकांचे आव्हान निर्माण झाले आहे. प्रभाग आरक्षण सोडत जाहीर होऊन २४ तास उलटायच्या आतच माजी महापौर किशोरी पेडणेकर यांच्या प्रभाग क्रमांक १९९ मध्ये उमेदवारीवरून वादाची ठिणगी पडली आहे.

सात रस्ता परिसरातील तब्बल २३ वर्षे शाखाप्रमुख पदावर कार्यरत असलेले गोपाळ खाडे महापालिका निवडणुकीसाठी इच्छुक होते. मात्र सोडतीत प्रभाग क्रमांक १९९ सर्वसाधारण महिलांसाठी आरक्षित झाला. त्यामुळे या प्रभागातून कोणत्याही जाती-धर्माच्या महिलांना निवडणूक लढवता येणार आहे. मात्र संधी हुकल्यामुळे आता या प्रभागातून खाडे यांची पत्नी आणि उपशाखा संघटक अबोली गोपाळ खाडे यांना उमेदवारी द्यावी अशी मागणी जोर धरू लागली असून तशा आशयाचे फलक सात रस्ता परिसरात झळकले आहेत. सात रस्ता आणि आसपासच्या परिसरातील शववाहिनी उपलब्ध करण्याचे काम खाडे गेली अनेक वर्षे करीत आहेत. त्यामुळे त्यांचा जनसंपर्क दांडगा आहे.

मुंबई महानगरपालिकेच्या मागील निवडणुकीमध्ये प्रभाग क्रमांक १९९ मध्ये उमेदवारीवरून शिवसेनेत नाराजी नाट्य घडले होते. काही शिवसैनिकांनी किशोरी पेडणेकर यांना विरोध करीत प्रभागात वास्तव्यास असलेल्या उमेदवारालाच निवडणुकीच्या रिंगणात उतवावे, अशी मागणी केली होती. मात्र किशोरी पेडणेकर उमेदवारी मिळविण्यात यशस्वी झाल्या. दरम्यान, लोकसभा आणि विधानसभा निवडणुकीच्या वेळी प्रभाग क्रमांक १९९ मधून शिवसेनेच्या (ठाकरे) उमेदवाराला मतांची फारशी कुमक मिळू शकली नाही. आता पुन्हा एकदा किशोरी पेडणेकर यांच्याविरोधात पक्षातील काही मंडळी आक्रमक झाली असून मंगळवारी रात्रापासूनच स्थानिक पातळीवर बैठकांचे सत्र सुरू झाले आहे.