मालवणीतील तरुणाच्या हत्येची उकल

मालाड-मालवणीतील मार्वे रोड परिसरात झालेल्या तरुणाच्या हत्याप्रकरणाची उकल करण्यात मालवणी पोलिसांना यश आले असून या प्रकरणी बिगारी कामगाराला अटक करण्यात आली आहे. दारू पिण्यावरून क्षुल्लक बाचाबाचीतून हत्या करण्यात आल्याचे स्पष्ट झाले आहे.
मार्वे रोड येथील झुडपामध्ये १४ फेब्रुवारी रोजी एका तरुणाचा मृतदेह आढळला होता. मृतदेहाची ओळख पटेल असा कुठलाही पुरावा पोलिसांना आढळला नव्हता. मालवणी पोलीस ठाण्याचे वरिष्ठ निरीक्षक मिलिंद खेतले यांच्या मार्गदर्शनाखाली सहायक निरीक्षक अमृत पवार आणि पथकाने तपास करून हा मृतदेह ममताज शेख या तरुणाचा असल्याची माहिती मिळविली. नाना नावाच्या इसमाबरोबर त्याचा वाद झाला होता, अशी माहिती मिळाल्यावरून या नानाचा शोध घेऊन त्याला अटक करण्यात आली. बिगारी काम करणाऱ्या सोमनाथ ऊर्फ गुलाब अवचरे याला अटक करण्यात आली.