महाराष्ट्र नवनिर्माण सेनेचे अध्यक्ष राज ठाकरे यांनी कर्नाटक विधानसभा निवडणुकीच्या पार्श्वभूमीवर निवेदन जारी करत मोठं विधान केलं. “कर्नाटकमधील सरकार मराठी माणसांना त्रास देणार असेल, मराठी भाषेची गळचेपी करण्याचा प्रयत्न करणार असेल, तर ते हे खपवून घेतलं जाणार नाही,” असा इशारा राज ठाकरेंनी दिला. तसेच कर्नाटक निवडणुकीच्या पार्श्वभूमीवर तेथील मराठी मतदारांना आवाहन केलं.
राज ठाकरे म्हणाले, “कर्नाटक विधानसभेच्या निवडणुकांसाठी येत्या १० मे ला मतदान आहे. तिथल्या सीमाभागातील माझ्या मराठी मतदार बंधू-भगिनींना माझं आवाहन आहे की, मतदान करताना एकजुटीने मराठी उमेदवारालाच मतदान करा. उमेदवार कुठल्या पक्षाचा का असेना तो मराठी असायला हवा आणि त्याने निवडून आल्यावर मराठी भाषेची सुरू असलेली गळचेपी, मराठी माणसांवर सुरू असलेला वर्षानुवर्षांचा अन्याय याविरोधात तिथल्या विधानभवनात वाचा फोडायलाच हवी.”
“कर्नाटक सरकार मराठी माणसांना त्रास देणार असेल, तर…”
“तुम्ही ज्या राज्याचे आहात, त्या राज्याची भाषा, तिथली संस्कृती याचा आदर केलाच पाहिजे, या ठाम मताचा मी आहे. सीमाभागात कित्येक पिढ्या राहणारे बांधव कन्नड भाषा आणि इथली संस्कृती याचा मान राखत आले आहेत. पण तरीही तिथलं सरकार जर मराठी माणसांना त्रास देणार असेल, मराठी भाषेची गळचेपी करण्याचा प्रयत्न करणार असेल तर ते हे खपवून घेतलं जाणार नाही,” असा इशारा राज ठाकरेंनी दिला.
“मध्यंतरी कर्नाटक सरकारने वातावरण तापवण्याचा प्रयत्न केला, तेव्हा…”
राज ठाकरे पुढे म्हणाले, “मध्यंतरी जेव्हा पुन्हा एकदा सीमावादाला कर्नाटक सरकारकडून खतपाणी घालून वातावरण तापवण्याचा प्रयत्न केला होता, तेव्हा मी म्हणालो होतो की, कर्नाटक आणि महाराष्ट्रात मुळात एकजिनसीपणा आहे. इथल्या अनेकांची कुलदैवतं कर्नाटकात आहेत, तर अनेक कन्नडिगांची कुलदैवतं महाराष्ट्रात आहेत. थोडक्यात दोन राज्यांतील बंध हा मजबूत आहे.”
“कुठल्याही पक्षाचं सरकार तिकडे येऊ दे”
“तेव्हा खरंतर कर्नाटक सरकारने सामंजस्याची भूमिका घेतली, तर संघर्षाची वेळच येणार नाही. पण कुठल्याही पक्षाचं सरकार तिकडे येऊ दे त्यांच्या वागण्यात यत्किंचितही फरक नसतो. म्हणूनच तिथल्या विधानभवनात मराठी भाषिक आमदार, जो त्या भागातील मराठी अस्मितेचं प्रतिनिधित्व करेल, मराठी माणसांच्या प्रश्नांसाठी आवाज उठवेल अशी लोकं असायला हवीत,” असं मत राज ठाकरेंनी व्यक्त केलं.
हेही वाचा : “बाहेर देता तसं काकांकडेही लक्ष द्या”, राज ठाकरेंच्या सल्ल्यावर अजित पवारांचं प्रत्युत्तर, म्हणाले…
“सीमाभागातील लोकांना १० मेला संधी आहे”
“यासाठी सीमाभागातील लोकांना १० मेला संधी आहे. मराठी आमदारच निवडून येतील हे तुम्ही पाहायला हवं. हे तुमच्या आणि पर्यायाने मराठी भाषेच्या हिताचं आहे. ही संधी दवडू नका,” असं आवाहन राज ठाकरेंनी केलं.
