महिलेला मारहाण करणाऱ्या ‘त्या’ पदाधिकाऱ्यावर मनसेची मोठी कारवाई; घेतला ‘हा’ निर्णय!

नेमकं काय झालं?

मुंबादेवी परिसरात गणपतीसाठी मनसेचा फलक लावण्यात येत होता. त्या ठिकाणी प्रकाश देवी यांचे औषधाचे दुकान आहे. त्यासमोर खांब उभारण्यात आला होता. मनसे पदाधिकारी विनोद अरगिळे हे सहकाऱ्यांसह तेथे हजर होते. त्यावेळी प्रकाश देवी यांनी त्यास विरोध केला. ताबडतोब हे सगळे काढून टाका असे त्यांनी सांगितले. त्यावरून विनोद अरगिळे व प्रकाश देवी यांच्यात वाद झाला आणि त्यातून विनोद अरगिळे यांनी त्या महिलेस ढकलून दिले व मारहाण केल्याचे व्हायरल व्हिडीओमध्ये दिसत आहे.

या प्रकारावरून वाद निर्माण झाला असताना विनोद अरगिळेंनी सारवासारव करण्याचा प्रयत्न केला. “ती बाई कोट्यधीश असून रोडवर हप्ता खाते. ती रोज रोडवर धंदे लावते. तिला विभागातील सर्वच नागरिक त्रासले आहेत. आम्ही गणेशभक्तांच्या स्वागतासाठी गेट लावत होतो तेव्हा या बाईने २० फुटांचा वासा ढकलून दिला. तो लाकडी वासा कुणाच्या अंगावर पडला असता तर अनेकजण जखमी झाले असते. हे राज ठाकरेच्या घरी लावा असं ही बाई म्हणाली. तसेच माझ्या अंगावर धावून आली”, असं अरगिळे म्हणाले आहेत.

“पक्षाच्या वतीने मी दिलगिरी व्यक्त करतो”

दरम्यान, या प्रकारावरून मनसेला लक्ष्य केलं जात असताना पक्षाकडून अरगिळेंवर कारवाई करण्यात आली आहे. “१ सप्टेंबर रोजी कामाठीपुरा या परिसरात घडलेली घटना पाहून मन विषण्ण झालं. पक्षाध्यक्ष राज ठाकरेंनी महिलांचा सदैव आदर केला आहे. तशाच प्रकारचा आदेश कार्यकर्त्यांना दिला असूनही ही घटना घडली याबाबत मी पक्षाच्या वतीने दिलगिरी व्यक्त करत आहे”, असं बाळा नांदगावकर यांनी पक्षाच्या वतीने जारी केलेल्या पत्रात म्हटलं आहे.

महिलेला मारहाण करणं राज ठाकरेंना तरी पटेल का? आरोपी मनसे पदाधिकारी म्हणाला…

“याबाबत पक्षानं कठोर भूमिका घेतली असून त्याचाच एक भाग म्हणून कामाठीपुरा विभागातील उपविभाग अध्यक्ष विनोद अरगिले याना पदमुक्त करण्यात येत आहे. भविष्यात या प्रकरणाची प्रत्यक्ष माहिती घेऊन, सखोल चौकशी करून योग्य तो निर्णय घेण्यात येईल. महिलांचा व ज्येष्ठांचा आदर-सन्मान राखला गेलाच पाहिजे”, असं या पत्रात नमूद केलं आहे.