सपना गिल विनयभंग प्रकरण : क्रिकेटपटू पृथ्वी शॉला १०० रुपयांचा दंड

अंधेरी येथील एका पबमध्ये सेल्फी काढण्यावरून झालेल्या वादानंतर शॉ आणि अन्य आरोपींनी आपला विनयभंग केल्याचा सपना हिचा आरोप आहे. शॉ याला झालेल्या मारहाणीप्रकरणी गिल हिला अटक करण्यात आली होती. त्यानंतर तिची जामिनावर सुटका झाली. सपनाने शॉ, त्याचा मित्र आशिष यादव आणि इतरांविरुद्ध विमानतळ पोलीस ठाण्यात विनयभंगाची तक्रार नोंदवली होती. परंतु, पोलिसांनी गुन्हा न नोंदवल्याने सपना हिने महानगरदंडाधिकारी न्यायालयात धाव घेतली.

तिच्या तक्रारीची दखल घेऊन महानगरदंडाधिकाऱ्यांनी सांताक्रूझ पोलिसांना चौकशी करून अहवाल सादर करण्याचे आदेश दिले होते. याप्रकरणी न्यायालयाने वारंवार आदेशही देऊनही शॉ याने भूमिका स्पष्ट केली नाही. त्यामुळे, न्यायालयाने त्याला १०० रुपयांचा दंड ठोठावला.