मुंबई : मालमत्ता कर थकवणाऱ्या पाच मोठ्या थकबाकीदारांच्या स्थावर मालमत्तांचा लिलाव मुंबई महापालिका करणार आहे. प्रथमच स्थावर मालमत्तांचा लिलाव करण्यात येणार असून या मालमत्तांमध्ये अंधेरी पश्चिमेकडील ओकवुड या हॉटेलचाही समावेश आहे. त्याचबरोबर म्हाडाचाही एक भूखंड आहे. लिलाव प्रक्रिया सुरू करण्यापूर्वी मुंबई महापालिका प्रशासनाने या पाच थकबाकीदारांना शेवटची २१ दिवसांची नोटीस बजावली आहे.
वर्षानुवर्षे मालमत्ता कर थकवणाऱ्या बड्या थकबाकीदारावर कठोर कारवाई करण्यास मुंबई महापालिका प्रशानसाने सुरुवात केली आहे. यापूर्वी मालमत्ता कर थकवणाऱ्या विकासकांच्या गाड्या जप्त करून त्यांचा लिलाव करण्याची कारवाई करण्यात आली. मात्र आता मुंबई महापालिकेने थकबाकीदारांच्या स्थावर मालमत्तांचा लिलाव करण्याचीही प्रक्रिया सुरू केली आहे. त्यामुळे मालमत्ता थकबाकीदारांना मुंबई महापालिकेने मोठाच धक्का दिला आहे. या कारवाईमुळे मोठ्या थकबाकीदारांना आपोआप चाप बसेल अशी अपेक्षा पालिकेच्या अधिकाऱ्यांनी व्यक्त केली आहे.
मुंबई महानगरपालिकेचा मालमत्ता कर थकवणाऱ्या करनिर्धारण व संकलन विभागाने मोठ्या थकबाकीदारांकडून कर वसूलीसाठी कठोर पावले उचलली आहेत. वर्षानुवर्षे कर न भरणाऱ्या मोठ्या थकबाकीदारांना नोटीसा पाठवल्यानंतरही त्याकडे काणाडोळा करणाऱ्या थकबाकीदारांच्या मालमत्ता जप्त करून त्याचा लिलाव करण्याचे ठरवले आहे. गेल्यावर्षी काही थकबाकीदारांच्या वाहनांचा लिलाव करण्यात आला होता. मात्र आतापर्यंत मुंबई महापालिकेने कधीही स्थावर मालमत्तांचा लिलाव केला नव्हता. भूखंड, इमारती अशा स्थावर मालमत्तांचा लिलाव करताना अनेकदा न्यायालयीन वाद असले की त्याचा लिलाव करण्यात अडथळा येतो. परंतु, यावेळी मुंबई महापालिकेने २४ विभागातील अशा बड्या थकबाकीदारांच्या स्थावर मालमत्तांचा शोध घेतला आहे. तसेच या मालमत्ताबाबत कोणतेही वाद नसल्याची खातरजमा विधि विभागामार्फत करण्यात येत आहे. ज्या स्थावर मालमत्ता कोणत्याही प्रकारच्या वादात नाहीत अशा पाच मालमत्तांचा लिलाव करण्यात येणार असून त्यासाठी मुंबई महापालिकेने जाहीर नोटीस प्रसिद्ध केली आहे. अन्य मालमत्तांची छाननी सुरू असून जसजशी छाननी पूर्ण होईल तसतशी त्यांचीही लिलाव प्रक्रिया सुरू केली जाईल अशी माहिती उपायुक्त विश्वास शंकरवार यांनी दिली.
मोठ्या थकबाकीदारांच्या मालमत्तांचा लिलाव करण्यात येणार असून त्यांना नियमानुसार २१ दिवसांची नोटीस बजावण्यात आली आहे. त्या कालावधीत त्यांनी थकबाकीची रक्कम चुकती केली नाही तर प्रशासन लिलावाची प्रक्रिया सुरू करेल, असा इशारा देण्यात आला आहे. – विश्वास शंकरवार, उपायुक्त, करनिर्धारण व संकलक
या आहेत पाच मालमत्ता
विभाग ……………मालमत्ता ———- क्षेत्रफळ …………………..एकूण थकबाकी (दंडासहित)
अंधेरी …………हॉटेल ओकवूड……..५८०५ चौरस मीटर …………..१९ कोटी ३६ लाख
कुर्ला ……..शांती सदन सहकारी सोसायटी भूखंड……२५७० चौरस मीटर …….३ कोटी २८ लाख
चेंबूर ………..म्हाडा…… सुभाष नगर येथील भूखंड ……..३९७३ चौरस मीटर ……..२ कोटी ७० लाख
मुंबादेवी …….मिनोचर माणेकशा गांधी घर आणि दुकान ……१६४८ चौरस मीटर …….२ कोटी २४ लाख
बोरिवली …… राजानी हाऊस ……६२४ चौरस मीटर …..३१ लाख ८१ हजार
