वीज पडून मुंबईत एकाचा मृत्यू

मृत व्यक्तीचे नाव चिंतामणी कोळी (३९) असे आहे

मनोरी खाडीत मासेमारीसाठी गेलेल्या दोन जणांवर वीज कोसळून झालेल्या दुर्घटनेत एकाचा मृत्यू झाला, तर एक जण जखमी झाला. शनिवारी रात्री ही घटना घडली. मृत व्यक्तीचे नाव चिंतामणी कोळी (३९) असे आहे, तर जखमी झालेल्या व्यक्तीचे नाव नरेश कोळी आहे.  शनिवारी रात्री साडेआठच्या सुमारास मनोरी खाडीत चिंतामणी कोळी आणि नरेश कोळी हे मासेमारीसाठी गेले होते. मासेमारी करून परतत असताना त्याच वेळी त्यांच्या अंगावर वीज कोसळली. यात दोघेही बोटीबाहेर फेकले गेले. ही घटना बाजूच्या बोटीतील अन्य लोकांनी पाहताच त्यांनी तात्काळ  दोघांना किनाऱ्यावर आणले. त्यानंतर उपचारासाठी रुग्णालयात दाखल केले असता चिंतामणी कोळी यांना मृत घोषित करण्यात आले.

मुंबईत ऊनसावलीचा खेळ

मुंबई : शनिवारी अनेक ठिकाणी मुसळधार पाऊस झाल्यावर रविवारी मुंबईत ऊनसावलीचा खेळ सुरू होता. शहराच्या काही भागांत पावसाच्या केवळ हलक्या सरी आल्या. शहरातील अतिवृष्टीचा इशारा हवामानशास्त्र विभागाने आधीच हटवला होता. सोमवारपासून पावसाचा जोर आणखी कमी होण्याची शक्यता आहे.  पुढील पाच दिवसांत मुंबई, नवी मुंबई व ठाणे परिसरात पावसाच्या केवळ हलक्या ते मध्यम स्वरूपाच्या सरी येतील, असा अंदाज मुंबई हवामानशास्त्र विभागाने वर्तवला आहे. रायगड, रत्नागिरी व सिंधुदुर्ग जिल्ह्य़ांत पुढील पाच दिवस काही ठिकाणी मुसळधार पावसाची शक्यता आहे.

 

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व मुंबई बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: One dead in mumbai due to lightening