मुंबई : ओटीटी माध्यमावर चित्रपट प्रदर्शित करण्यावरून अभिनेत्री पूजा बॅनर्जी आणि निर्माता श्याम डे यांच्यात झालेला वाद विकोपाला गेला आहे. डे याने दीड कोटी रुपयांची आर्थिक फसवणूक केल्याची तक्रार केल्यानंतर बांगूर नगर पोलिसांनी डे यांच्याविरोधात फसवणुकीचा गुन्हा दाखल केला आहे. यापूर्वी डे यांच्या तक्रारीवरून मे महिन्यात गोवा पोलिसांनी पूजा बॅनर्जी आणि तिच्या पतीविरोधात फसवणूक, अपहरण, मारहाण, खंडणीचा गुन्हा दाखल केला होता.
नेमके प्रकरण काय?
अभिनेत्री पूजा बॅनर्जीने बांगून नगर पोलीस ठाण्यात दिलेल्या तक्रारीनुसार, एप्रिल २०२५ मध्ये निर्माता श्याम डे यांनी ओटीटी माध्यमावर प्रदर्शित होणाऱ्या १६ नव्या चित्रपटांच्या प्रदर्शनाचे हक्क मिळविण्यासाठी गुंतवणूक करण्यास सांगितले होते. यासाठी व्हायकॉम १८ या कंपनीसोबत व्यवहार सुरू असल्याचा दावा केला. यासंदर्भात एका ई-मेलचा स्क्रीनशॉटही दाखवला. यावर विश्वास ठेवून पूजा व कुणाल यांनी ९ एप्रिल रोजी गुंतवणुकीचा करार केला. यानंतर १७ एप्रिल ते ५ मेदरम्यान दोघांनी मिळून ‘शॅडो फिल्म्स’, ‘माधव एंटरप्रायझेस’ आणि ‘अल्ट्रा ट्रॅव्हल्स’च्या बँक खात्यांमध्ये एकूण १ कोटी ६८ लाख रुपये पाठवले. काही दिवसांनी डे आजारी पडले.
त्याच्यावर कोकिळाबेन रुग्णालयात उपचाराचा खर्चही केल्याचा दावा पूजा आणि कुणाल यांनी केला आहे. मात्र, करारानुसार परतावा मिळत नसल्यामुळे त्यांनी डे यांच्याकडे पैसे परत मागितले. डे यांनी जूनअखेरपर्यंत पैसे परत देण्याचे आश्वासन दिले होते. त्यांनी प्रत्यक्षात केवळ १० लाख रुपये परत केले. त्यामुळे पूजा बॅनर्जीने बांगूर नगर पोलीस ठाण्यात फसवणुकीची तक्रार दाखल केली. त्यानुसार बांगूर नगर पोलिसांनी १६ जुलै रोजी श्याम डे यांच्याविरुद्ध फसवणुकीचा गुन्हा दाखल केला आहे.
अभिनेत्री आणि पतीवर गोव्यात गुन्हा
दुसरीकडे, श्याम डे यांची पत्नी मालविका डे हिने मे महिन्यात गोवा पोलिसांत पूजा आणि कुणालविरोधात अपहरण, मारहाण आणि खंडणीचा गुन्हा दाखल केला आहे. या तक्रारीनुसार ३१ मे रोजी गोव्यातील एका दौऱ्यावर असताना पूजा आणि तिच्या पथकाने श्याम डे यांना गाडी थांबवून अज्ञात स्थळी नेले. तिथे त्यांना मारहाण केली, धमकावले आणि बनावट अमली पदार्थ प्रकरणात अडकवण्याची धमकी देऊन सुमारे २३ लाख रुपये उकळल्याचा आरोप आहे. यात काही रक्कम पूजाचा सहायक मुनमूनला कोलकात्यात दिल्याचे, तसेच काही रक्कम पूजा व कुणाल यांच्या खात्यांमध्ये पाठवल्याचे म्हटले आहे. या दोघांनी डे यांचा मोबाइल घेऊन वैयक्तिक माहिती आणि पासवर्ड मिळवले.
जबरदस्तीने चित्रफित तयार करून ‘ऍंबर व्हिला’ रिसॉर्टमध्ये आपण स्वेच्छेने राहत असल्याचे कबूल करायला लावले, असा गंभीर आरोपही करण्यात आला आहे. या प्रकरणी गोवा पोलिसांनी पूजा बॅनर्जी व कुणाल वर्मा यांच्याविरोधात भारतीय न्याय संहिता (बीएनस) अंतर्गत कलम १२६ (२) (अनधिकृत अडवणूक), १३७ (२) (अपहरण), १४० (२) (खंडणीसाठी अपहरण), ३०८ (२) (खंडणी), ११५ (२) (हानी पोहोचवणे), ३५१(३) (धमकी), ६१ (२) (कट रचणे) आणि ३(५) (समान हेत) अंतर्गत गुन्हा दाखल केला आहे.
