Salman Khan Firing Case : आरोपीच्या पोलीस कोठडीतील आत्महत्येनंतर राऊतांचे फडणवीसांवर आरोप, म्हणाले…

सलमान खानच्या घराजवळ गोळीबार करणाऱ्या आरोपीला बंदूक पुरवणारा अनुज थापन पोलीस कोठडीत होता. कोठडीतच त्याने गळफास घेऊन आत्महत्येचा प्रयत्न केला. त्यानंतर त्याला रुग्णालयात दाखल होतं. मात्र, रुग्णालयात उपचारांदरम्यान त्याचा मृत्यू झाला. याप्रकरणी सूत्रांनी दिलेल्या माहितीनुसार, थापन याला पोलीस मुख्यालयातील लॉकअपमध्ये ठेवण्यात आलं होतं, तिथेच त्याने गळफास घेतला. मुख्यालयाच्या पहिल्या मजल्यावरील पोलीस लॉक-अपच्या बाथरूममध्ये सकाळी ११ वाजता ही घटना घडल्याचं एका पोलीस अधिकाऱ्याने सांगितलं.

याप्रकरणी शिवसेनेच्या ठाकरे गटातील खासदार संजय राऊत यांनी प्रतिक्रिया दिली आहे. ही प्रतिक्रिया देताना राऊत यांनी गृहमंत्रालयाकडे संशयाचं बोट दाखवलं आहे. राऊत म्हणाले, या प्रकरणात रहस्यच रहस्य आहेत. पोलीस कोठडीत एखाद्या संशयित आरोपीचा मृत्यू होतोय, याचा अर्थ या घटनेला महाराष्ट्राचं गृहमंत्रालय, गृहमंत्री देवेंद्र फडणवीस आणि मुंबईचे पोलीस आयुक्त जबाबदार आहेत. याप्रकरणी तपास करण्याची मागणी करूनही काही होणार नाही. त्यासाठी सरकार बदलणं आवश्यक आहे. सरकार बदललं तर अशा प्रकरणांत तपास होईल. आता हे लोक (गृहमंत्री आणि पोलीस) हे प्रकरण दाबतील.

हे ही वाचा >> पंतप्रधान नरेंद्र मोदींची काँग्रेसला तीन आव्हानं; म्हणाले, “युवराजांमध्ये हिंमत असेल तर…”

अनुज थापन हा ट्रकवर मदतनीस (क्लीनर) म्हणून कामाला होता. कुख्यात लॉरेन्स बिष्णोई टोळीकडून दोन्ही आरोपींना दोन पिस्तुलं व ४० काडतुसं पुरवण्यात आली होती. ही पिस्तुलं देण्यासाठी चंदर आणि थापन दोघेही १५ मार्चला पनवेलला गेले होते. ते पनवेलमध्ये तीन तास थांबले होते. पिस्तुल गुप्ता आणि पाल या दोन आरोपींना देण्यापूर्वी चंदर आणि थापन यांनी दोन गोळ्या झाडल्याचा संशय होता.